Prishtinë. Sëmundja e kancerit të gjirit, që konsiderohet një nga vrasësit më të mëdhenj të femrave, tani e tutje mund të diagnostikohet nëpërmes një aparature të sofistikuar, të cilën QKUK-së ia kanë dhuruar të enjten një ekip i profesionistëve shëndetësorë amerikanë. Ky donacion është pjesë e projekteve të organizatës joprofitabile amerikane “Radiology Mammography International (RMI)”, të udhëhequr nga radiologu Richard Hirsh.

Aparatura e dhuruar me të gjitha pajisjet përcjellëse ka bërë të mundur që në Institutin Onkologjik të përurohet kabineti i mamografisë.

Richard Hirsh ka sqaruar se në kuadër të këtij donacioni përveç aparaturës, është përfshirë edhe trajnimi i stafit vendor për leximin dhe interpretimin e mamografisë nga profesionistët shëndetësor që veprojnë në kuadër të RMI.

“Ky donacion nuk është dhuratë për spitalin as për radiologët, por është dhuratë për gratë, për familjet e Kosovës sepse mamografia shpëton jetë, duke diagnostikuar sa më herët kancerin e gjirit”, ka thënë Hirsh. Sipas tij, e vetmja mënyrë që ky projekt të ketë sukses, jetëgjatësi dhe qëndrueshmëri është bashkëpunimi i mirë mes radiologëve, udhëheqësve të Institutit dhe përkrahjes së MSH-së.

Ndërkaq, ministri i Shëndetësisë, Bujar Bukoshi duke falënderuar të gjithë profesionistët vendor dhe të huaj, që kanë ndihmuar jetësimin e këtij projekti tha se diagnostikimi i hershëm i kancerit të gjirit te femrat, është një nga objektivat në kuadër të Strategjisë Sektoriale të MSH-së.

“Ne me përkushtim do të punojmë në preventivë për të ulur sëmundshmërinë dhe vdekshmërinë nga ky vrasës i femrave”, ka thënë Bukoshi duke e vlerësuar si shumë të rëndësishëm për momentin trajnimin e kuadrove kosovare për mamografi.

Derisa kabineti i mamografisë me këtë donacion është kompletuar me të gjithë aparaturën e nevojshme, ai tha se do të vazhdohet me edukimin e kuadrove dhe dërgimin e personelit shëndetësor për trajnim jashtë vendit.

Ndërkaq, Xhavit Bicaj ka sqaruar se mamografia për herë të parë në Kosovë ka filluar të aplikohet në vitin 1985 në kuadër të shërbimit të onkologjisë me radioterapi në Qendrën Diagnostike. Por, për shkak të një zhvillimi të shpejtë të teknikës ai ka thënë se ky donacion është shumë i mirëseardhur për diagnostikimin e hershëm të kësaj sëmundjeje, gjë që si konsiderohet si e vetmja masë mbrojtëse për shërimin e saj.

Sipas tij, numri i rasteve që po diagnostikohen me kancer të gjirit në vendin tonë është duke u rritur. Derisa para 10-15 viteve brenda javës është diagnostikuar 1 rast me kancer të gjirit, tani brenda javës diagnostikohen 5-6 raste të tilla.