Prishtinë. Agjencia Kosovare e Inteligjencës (AKI) tashmë ka filluar trajnimin e grupit të parë të të rekrutuarve, pas procesit të intervistimit dhe verifikimit të listave të mbi 3.500 kandidatëve që kanë aplikuar. Megjithatë, drejtues të Komisionit për Mbikëqyrjen e Agjencisë së Inteligjencës, ekspertë të sigurisë, por edhe zyrtarë të subjekteve politike që i takojnë taborit opozitar, janë skeptik se shërbimi sekret i Kosovës do të funksionalizohet deri në fund të këtij viti, ashtu sikurse kanë premtuar drejtues të AKI-së. Ata kanë shfaqur shqetësimin e tyre, se Kosova do të mund të ndërtojë një shërbim sekret profesional, sipas standardeve ndërkombëtare, që do të mund t’i rezistojë politikës.

Kryetari i Komisionit Parlamentar për Mbikëqyrje të Agjencisë së Inteligjencës, Gani Geci, ka konfirmuar për gazetën “Zëri”, se AKI-ja ka filluar me trajnimin e grupit të parë të informatorëve. “Po, tashmë ka përfunduar procesi i verifikimit të listave dhe intervistimit të kandidatëve të grupit të parë, ndërkaq aktualisht është duke u bërë trajnimi i këtij grupi”, ka bërë të ditur Geci, duke mos dashur që të japë detaje për numrin e saktë të “spiunëve” që i takojnë grupit të parë.

“Ndarja në grupe e të rekrutuarve është bërë në bazë të organogramit të punës së AKI-së”, ka thënë ai. Megjithatë, Geci mendon se funksionalizimi i AKI-së është një proces i ngadalshëm, edhe përkundër zotimeve të drejtorit të Shërbimit të Inteligjencës, Bashkim Smaka, se deri në fund të vitit do të bëhet funksionalizimi i njësive të para operative. “Se a do të shkojnë gjërat në drejtim e duhur, kjo mbetet të shihet, edhe pse është shumë vështirë që Kosova të ndërtojë një shërbim sekret, ku politika do të qëndrojë sa më larg saj”, ka thënë Gani Geci... (shkrimin e plotë mund ta lexoni në numrin e sotëm të Gazetës "Zëri")