Prishtinë. Partnerët e koalicionit aktual qeverisës, Partia Demokratike e Kosovës dhe Lidhja Demokratike e Kosovës janë përplasur javën e kaluar për atë se kush duhet të udhëheq me Universitetin Publik të Prizrenit. Mësohet se këto përplasje ndërmjet partnerëve të koalicionit kanë përfunduar paqësisht, me “marrëveshje” që të dyja palët të kenë njerëzit e tyre në menaxhmentin e këtij universiteti, ndonëse nuk janë konfirmuar zyrtarisht.

Adem Sallauka, që njihet si njeri i afërt me PDK-në, sipas burimeve të “Zërit” me gjasë edhe në të ardhmen do të vazhdoj ta mbajë postin e sekretarit në Universitetin e Prizrenit, në anën tjetër, pritet që Arsim Rexhepi, deputet i LDK-së, të emërohet në postin e zëvendësrektorit në këtë universitet.

Njohës të arsimit dhe përfaqësues të partive opozitare kanë alarmuar se universiteti i dytë publik në vend po shkon drejt politizimit.

Emërimi i rektorit gjerman Ronald Monch nga ana e Ministrisë së Arsimit, Shkencës dhe Teknologjisë si dhe sekretarit të Universitetit të Prizrenit Adem Sallauka, ish-sekretar në këtë ministri, kishte nxitur reagime në radhët e LDK-së.

Kërcënimet e Rexhepit

Burime të “Zërit” brenda Universitetit Publik të Prizrenit kanë bërë të ditur se anëtari i LDK-së, Arsim Rexhepi, i cili në të njëjtën kohë është edhe kryetar i Komisionit Parlamentar për Arsim, javën e kaluar ka pasur një “vizitë” shumë të shkurtër te udhëheqësit e UPZ-së, të cilëve u ka kërkuar sqarime për përzgjedhjen e stafit menaxherial të UPZ-së.

Rexhepi për më tepër ka kërkuar sqarime për gjoja “tradhtinë” që i ka bërë PDK-ja LDK-së për këtë universitet. “Rexhepi drejtuesve të UP-së u ka thënë se marrëveshja ka qenë që pozita e sekretarit duhet t’u takojë njerëzve të LDK-së, ndërkaq, pozita e zëvendësrektorit njerëzve të PDK-së”, ka thënë burimi, duke shtuar se në pozitën që është dashur t’i takonte LDK-së, është emëruar Adem Sallauka, i cili njihet si njeri i afërt me PDK-në, që më herët ka mbajtur edhe pozitën e sekretarit të përhershëm në Ministrinë e Arsimit. Gjithnjë sipas këtyre burimeve, kjo ka qenë pozita që ka konfrontuar dy partitë në koalicion.

Mirëpo, si kompromis duket se është vendosur që pozita e zëvendësrektorit t’u jepet njerëzve të LDK-së.

Madje burime brenda Lidhjes Demokratike të Kosovës kanë bërë me dije se Arsim Rexhepi sipas të gjitha gjasave do të emërohet në pozitën e zëvendësrektorit.

“Ka shumë gjasa që Arsim Rexhepi të emërohet zëvendësrektor i Universitetit të Prizrenit”, ka thënë një burim brenda LDK-së.

Por, një gjë e tillë është mohuar nga vetë Rexhepi. Ai nuk ka pranuar se ka marrëveshje me PDK-në. Ai ka mohuar kategorikisht se do të emërohet zëvendësrektor i Universitetit të Prizrenit duke e quajtur këtë si dezinformatë.

“Se kush do të emërohet zëvendës rektor, në bazë të ligjit është detyrë e rektorit. Ai do t’i sjellë bashkëpunëtorët e vet dhe ai do të vendos për njerëzit e tij të afërt. Natyrisht se unë kam qenë pjesë e themelimit të këtij universiteti”, ka thënë Rexhepi për “Zëri”. Ai ka theksuar se ky universitet nuk ka natyrë partiake, por është krejtësisht kombëtar dhe një vepër madhore e qeverisë.

Në anën tjetër, Artan Behrami, këshilltar për media në MASHT ka theksuar se nuk ka informacion nëse Rexhepi është emëruar në detyrën e zëvendës rektorit. “Ne si Ministri e Arsimit nuk mund ta paragjykojmë procesin sepse është në kompetencë e rektorit themelues për ta zgjedhur stafin administrativ. Është në kompetencën e tij ta zgjedhë zëvendës rektorin, sekretarin dhe stafin tjetër akademik”, ka thënë Behrami. Emërimet në Universitetin e Prizrenit, sipas Behramit janë çështje që nuk i takojnë MASHT-it.

Megjithëkëtë, dihet se emërimi i Sallaukës në postin e sekretarit është bërë shumë kohë para se të emërohet rektori themelues.

“Politizimi ende pa ia filluar punës”

Mirëpo, përfaqësues të opozitës dhe shoqërisë civile kanë deklaruar se universiteti i ri po dëmtohet edhe pa nisur mirë punën dhe është duke u politizuar me emërimet që po bëhen atje.

Avni Zogiani udhëheqës i Lëvizjes “Çohu” ka thënë se fakti që partitë politike merren vesh mes vete për ndarjen e posteve në universitete tregon për shkallën e politizimit dhe të degradimit të universitetit dhe të edukimit përgjithësisht. “As ky pushtet dhe as pushtetet e kaluara nuk kanë pasur asnjë lloj ndjeshmërie për gjendjen e rëndë në arsim, por atë e kanë përdorur vetëm si politikë elektorale”, ka theksuar Zogiani.

Ndërkaq, Jonuz Salihaj, kryetar i komisionit për arsim në AAK ka thënë se kjo qeveri ka uzurpuar dhe politizuar të gjitha segmentet e qeverisjes.

“Ministri Hoxhaj shumicën e kohës e ka kaluar në fushata elektorale të komunave të Kosovës, rol ky që më së pakti i ka hije ministrit të arsimit. Sistemi i arsimit është krejtësisht i politizuar. Në MASHT për dy vite janë ndërruar 5 sekretarë permanent, nuk janë respektuar vendimet e Këshillit të Pavarur Mbikëqyrës për kthimin e njerëzve të larguar nga puna për qëllime politike… etj. Njëri sekretar, pra Sallauka, nga pozita e sekretarit permanent, ministri Hoxhaj e dërgon sekretar të Universitetit të Prizrenit. Qëllim i vetëm është kontrollimi i Universitetit më të ri në Kosovë. Prandaj nuk diskutohet politizimi, sepse kemi të bëjmë me politizimin e skajshëm të arsimit në të gjitha nivelet”, ka thënë Salihaj.

Nëse në krye të këtij universiteti vendoset një njeri që njihet si deputet i LDK-së, në këtë rast Rexhepi dhe vazhdon të jetë sekretar, ish sekretari i MASHT-it Adem Sallauka, Salihaj ka thënë se nuk kemi të bëjmë me intencën për krijimin e një universiteti efikas, por shfrytëzimin e tij si një makinë për përftimin e votave të qytetarëve të Prizrenit.

Ndërkaq sa i përket emërimit që mund të ndodh të Rexhepit, Salihaj ka theksuar se sipas Ligjit për Arsimin e Lartë ( neni, 6.1) vendimi për hapjen e universitetit të ri duhet të ratifikohet në Kuvend.

“Prandaj votat e Grupit Parlamentar të LDK janë të domosdoshme”, tha ai duke shtuar se nuk është qëllimi të krijohet një universitet cilësor, por krijimi i një institucioni të kontrollueshëm nga pozita.

“Kjo nuk ka si të përshkruhet ndryshe përveç si ndërhyrje direkt në autonominë e universitetit”, ka thënë ai për “Zëri”. Ndërkohë edhe parti tjera opozitare kanë bërë thirrje që Universiteti i Prizrenit të mbetet i papolitizuar. Abdullah Klinaku, sekretar i përgjithshëm i Partisë së Drejtësisë ka thënë se është e rëndësishme të kuptohet nga politikëbërja kosovare respektimi i plotë i autonomisë së funksionimit ligjor të botës akademike në Kosovë, në kuptim të kësaj edhe të universiteteve, duke respektuar ligjet gjegjëse dhe duke iu shmangur çdo elementi të ndonjë konflikti të mundshëm të interesit.