Prishtinë. Aleanca për Ardhmërinë e Kosovës (AAK), me rastin e festës së Fitër Bajramit, uron kreun e Bashkësisë Islame të Kosovës, myftiun Naim Tërnava dhe të gjithë besimtarët islamë.

“Me rastin e festës së Fitër Bajramit, AAK jua përcjellë urimet më të përzemërta të gjithë besimtarëve në vend, duke vlerësuar se kjo festë vjen pas shumë ditësh të agjërimit, përkushtimit dhe falënderimit të besimtarëve ndaj Krijuesit dhe duke ngjallë ndjenjën fisnike të mbështetjes dhe solidaritetit midis njerëzve”.

“Në këtë moment, të gjithë ne, gjithashtu, kujtojmë të kaluarën tonë dhe ata që iu falën lirisë, atdheut dhe shtetit që sot po e ndërtojmë, duke synuar, me vizion të qartë dhe me më shumë përkushtim, angazhim e sinqeritet, ndërtimin e shtetit tonë, Republikës së Kosovës, dhe të një jete më të mirë për të gjithë qytetarët tanë”, thuhet në telegramin e urimit të Aleancës për Ardhmërinë e Kosovës.