Prishtinë. Me rastin e festës së Bajramit të Madh, Kryetari i Aleancës Kosova e re (AKR), Behgjet Pacolli, ka dërguar një telegram urimi për besimtarët Myslimanë, duke shprehur falënderimin e tij për solidaritetin njerëzor.

“Dashtë Zoti që çdo vit me kënaqësinë më të madhe të shfrytëzoj rastin që pas Muajit të shenjtë të Ramazanit t’ju urojë festën e madhe të gjithë Myslimanëve, Fitër-Bajramin. Ju përcjell urimet e mia dhe të Partisë që unë drejtoj ”Aleanca Kosova e Re”, dëshirat më të mëdha dhe më të përzemërta Juve dhe familjeve të Juaja, një vit të mbarë e të suksesshëm në Republikën e Kosovës”, tha Behgjet Pacolli.

Kryetari i AKR-së, Pacolli, me këtë rast siguroi popullin e Kosovës se AKR do të bëjë gjithçka është e mundur që vendin tonë ta çojë drejt integrimeve evropiane.

“Më lejoni, të ju siguroj se unë me Partinë “Aleanca Kosova e Re” do të bëjmë që Kosova dhe populli i saj të vazhdojnë të përqendrohen në përmbushjen e detyrave për çështjet e rëndësishme për shtetin e Kosovës, ku do të jetë edhe një shtytje shtesë në përpjekjet tona në rrugën drejt Bashkimit Evropian”, u shpreh Pacolli.

“Gjatë çdo kremtimi të festës së Bajramit, shqiptarët kudo që ndodhen në botë, mblidhen së bashku për të festuar. Në kohë lufte dhe në paqe, në ditë të vështira e të lumtura, mes hallesh të shumta dhe gëzimesh të mëdha, gjatë festës së Fitër Bajramit, kosovarët plotësojnë një ndjenjë të shtrenjtë: krenarinë kombëtare, solidaritetin njerëzor dhe shpresën për një të ardhme më të mirë”, tha për fund kryetari i AKR-së, Behgjet Pacolli.