Edhe pse nuk ka ligj që ndalon homoseksualitetin, shoqëria kosovare vazhdon të jetë shumë konservatore karshi dashurisë mes të njëjtit seks, duke e konsideruar këtë si jonormale dhe të papranueshme për shoqërinë. Kjo çështje edhe më tej konsiderohet si “tabu” temë, për të cilën nuk po punohet hiç nga institucionet.

Për të diskutuar rreth të drejtave të njeriut, në këtë rast edhe homoseksualëve, direkt nga Shtëpia e Bardhë në Uashington është paraqitur nëpërmjet videolidhjeve Dan Bear, zëvendësndihmës i sekretarit të Shtetit, i cili iu përgjigj pyetjeve të shumta të dërguara prej mediave nga e gjithë bota, përfshirë edhe nga Kosova.

“Të jesh homoseksual nuk të bën më pak njeri dhe nuk të jep më pak të drejta se të tjerëve. Kështu që në të gjitha vendet duhet punuar të gjithë për të ngritur vetëdijen, për të trajtuar në mënyrë të barabartë të gjithë, dhe më së shumti në këtë drejtim mund të bëhet përmes bisedave”, u përgjigj Bear në pyetjen nga Kosova lidhur me atë se çfarë duhet bërë që në Kosovë të kapërcehen pengesat e tilla.

Sipas tij, ka mjaft punë që mund të bëhen në këtë drejtim, duke u nisur nga bisedat me miqtë, me bashkëpunëtorët, në punë, apo edhe në xhami e kishë.

“Vetë qytetarët mund të ndihmojnë në ndërtimin e tolerancës përmes punës që bëjnë çdo ditë. Edhe figurat publike, qofshin ata liderë politikë ose të famshëm, apo kushdo tjetër që ka qasje në një platformë publike, duhet të fl asin dhe të artikulojnë mesazhe të barazisë, që të gjithë kanë të drejtat e barabarta, të gjithë kanë dinjitetit të barabartë. Bisedat e tilla publike, mendoj që mund të sjellin ndikim të madh në çdo shoqëri”, tha më tej Bear.

Ai po ashtu tha se në çdo vend të botës duhet të ketë hapësirë dhe mbrojtje për të gjithë ata që përpiqen të fl asin për të drejtat e homoseksualëve, sepse debati kontribuon në masë të gjerë.

Pse të drejtat e homoseksualëve janë prioritet për SHBA-në, Bear tha: “Përgjigjja është e thjeshtë: “Të drejtat e njeriut janë prioritet i Qeverisë së SHBA-së”.