Universiteti i Prizrenit do të përfitojë edhe nga një projekt tjetër që financohet nga Komisioni Evropian përmes projektit TEMPUS. Ky program, i cili është iniciuar duke u mbështetur në nevojat lokale, është zhvilluar nga WUS Kosova dhe si objektiv kryesor ka themelimin e strukturës së qëndrueshme për sigurimin e cilësisë në këtë universitet.

Drejtues të WUS Kosova kanë bërë të ditur se programi do të jetë bazë e mirë për ngritjen e kapaciteteve që do të kenë rol të veçantë në ngritjen dhe sigurimin e cilësisë së studimeve në UPZ. But Dedaj, udhëheqës i “WUS Kosova”, ka thënë se ky projekt është i dedikuar të trajtojë thelbin e avancimit të cilësisë në mësimdhënie.

“Përmes shumë aktiviteteve që janë paraparë të realizohen në këtë program, duke u mbështetur në eksperiencat evropiane që do të barten nga universitet partnere të projektit, do të trajnohet personeli mësimor që të themelojë dhe avancojë instrumentet e ndryshme që sigurojnë cilësi në mësimdhënie, që patjetër duhet t’i korrespondojnë nevojave të studentëve, për t’u përgatitur për kërkesat e tregut të punës”.

Projekti “Mbështetje strategjike për zhvillimin dhe forcimin e strukturave për sigurim të cilësisë në Universitetin e Prizrenit”, sipas Dedajt, tregon qartë se sa mund të përfitohet nga ky projekt. “Arsimi i lartë në të gjithë Evropën si qëllim kryesor ka sigurimin e cilësisë. Cilësia është indikatori kryesor që dallon universitetet në mes vete, ngre reputacionin e institucioneve moderne të arsimit të lartë në botën e zhvilluar, ngre interesimin e kompanive për kuadro, si dhe është instrumenti kryesor për rangimin-krahasimin e universiteteve”.

Në kuadër të projektit për sigurim të cilësisë, UPZ-ja do të emërojë koordinatorët për secilin program mësimor, si dhe zyrtarin qendror për sigurim të cilësisë në këtë universitet. Gjatë tri viteve të zbatimit të projektit, Dedaj ka thënë se personat përkatës do të trajnohen dhe do të krijojnë një strukturë nëpër fakultetet përkatëse dhe në nivel qendror gjithashtu.

Partnerët nga Evropa, të udhëhequr nga Universiteti i Shkencave të Aplikuara “Osnabrueck”, i cili njëkohësisht është edhe grant mbajtës, sipas Dedajt, do të bartin eksperiencat e tyre se si funksionojnë universitetet për sigurimin e cilësisë. Në kuadër të këtij programi do të intervenohet edhe për krijimin e cilësisë së ligjëratave, duke mbajtur trajnime për personelin mësimor në UPZ-së.

“Ky universitet ka një personel të ri, disa prej tyre kanë pasur eksperienca ose janë të angazhuar edhe nga Universiteti i Prishtinës, apo kanë qenë të angazhuar diku tjetër e kanë kaluar në UPZ. Mirëpo, disa prej tyre nuk kanë pasur asnjë ditë eksperiencë në mësimdhënie. Këto trajnime janë me së të nevojshme, veçmas për ata të cilët rishtazi kanë filluar këtë profesion, pasi metodat e mësimdhënies vazhdimisht avancohen, janë në proces”. Programi TEMPUS është trevjeçar dhe mbështetet nga Komisioni Evropian.

Partnerë tjerë të përfshirë nga EU janë edhe Universiteti i Edinburgut, ai i Gjironës dhe Universiteti Teknologjik nga Suedia. Ndërkaq, partnerët vendorë janë Ministria e Arsimit, WUS Kosova dhe Agjencia e Akreditimit e Kosovës.