Reshjet e pandërprera të borës gjatë ditëve të fundit kanë vështirësuar qarkullimin në të gjitha rrugët e Kosovës. Ndërkaq, ende vazhdojnë të mbeten të bllokuara për mjete të rënda transportuese shumica e rrugëve nacionale, derisa vështirë të kalueshme janë edhe për mjetet e lehta qarkulluese.

Zëdhënësi i Policisë së Kosovës, Baki Kelani, ka thënë se të gjitha rrugët kryesore urbane janë të kalueshme por me vështirësi, megjithatë, sipas tij, ende ka rrugë të bllokuara. “Rruga Pejë-Rozhajë ende mbetët e bllokuar për mjetet e rënda transportuese, mbetet e bllokuar rruga për Rugovë në rajonin e Pejës, rrugët në Shalë të Bajgorës. Po ashtu ka bllokime të rrugëve nëpër fshatra që kryesisht janë malore”, ka thënë Kelani.

Sipas tij, rrugët në nivel Kosove që janë të vështirësuara për t’u kaluar janë rruga për pikëkalimin Mutivoda, tek Dheu i Bardhë, Glloboçicë, rajonin e Batllavës dhe disa zona të Gollakut, Dragashit dhe pjesë të tjera që janë në viset malore. Sipas tij, vlen të përmendet se për shkak të vështirësive nëpër rrugët e Kosovës “është lajm i mirë që të hënën nuk ka pasur aksidente me fatalitet përpos disa të tjerave me dëme materiale”.

Në Dukagjin vazhdon gjendja e jashtëzakonshme

Trashësia e borës dhe acari, si dhe reshjet e reja të borës, vazhdojnë të mbajnë gjendjen e jashtëzakonshme, e cila edhe zyrtarisht është shpallur nga autoritetet e komunës së Deçanit dhe asaj të Junikut.

Me gjithë hapjen e rrugëve lokale nga komunat përkatëse dhe firmat private, rrugët nëpër fshatra kryesisht janë të ngushta, përkatësisht njëdrejtimëshe dhe mezi qarkullojnë automjetet.

Ndërkaq, edhe më tej mbetet e bllokuar rruga malore që shpie në drejtim të fshatrave Jasiq dhe Gjocaj të Junikut, ndërkohë e bllokuar ka mbetur edhe rruga në Grykën e Deçanit që shpie në drejtim të hidrocentralit “Lumbardhi”.

Admir Hasanaj, drejtor i Drejtorisë Komunale për Shërbime Publike të Deçanit, thotë se i tërë mekanizmi ekzistues për pastrimin e borës, sikurse edhe ai i disa fi rmave private janë angazhuar për hapjen e rrugëve në terren.

Në fshatrat e Dushkajës, Mazniku, Dashinoci dhe Ratishi i Epërm dhe i Ulët dhe disa nga fshatrat e regjionit të Vokshit, vështirësitë e qarkullimit janë evidente. Edhe në Komunën e Junikut, në të cilën para tri dite është shpallur gjendje e jashtëzakonshme, me gjithë angazhimet për hapjen e rrugëve, situata është e vështirë.

Agron Kuçi, kryetar i Komunës, ka thënë se të gjitha rrugët lokale janë të hapura, por kështu nuk ka ndodhur me rrugën që shpie në drejtim të fshatrave Jasiq dhe Gjocaj.

“Në mungesë të mekanizmit akoma nuk kemi mundur të pastrojmë rrugën në drejtim të këtyre dy fshatrave malore”, ka thënë ai, duke treguar se në të dyja këto fshatra jetojnë vetëm 10 familje, përderisa të tjerat që nga paslufta janë të vendosura në vendbanimin kolektiv “Agim Ramadani” në afërsi të Junikut.

Ndërkaq, edhe në rrugët magjistrale Pejë- Deçan- Gjakovë dhe atë Deçan–Junik me gjithë pastrimin e tyre komunikacioni po zhvillohet me vështirësi. Autobusët po qarkullojnë shumë rrallë, ndërkohë në këto rrugë vërehen pak automjete në qarkullim.

Makineri shtesë për hapjen e rrugëve në Berishë

Qeveria Komunale e Malishevës ka vlerësuar se situata më e rëndë paraqitet në fshatrat që shtrihen në vargmalet e Berishës. “Fshatrat që shtrihen në këtë pjesë, kanë vështirësi në qarkullim, pasi si pasojë e reshjeve të vazhdueshme dhe erërave, vazhdimisht po bllokohet rruga, sidomos në fshatrat Berishë dhe Fshat i Ri, ndërsa në pjesët tjera të komunë së Malishevës, rrugët janë kryesisht të kalueshme”, ka raportuar Ejup Zulfaj, shef i Drejtorisë për Mbrojtje dhe Shpëtim.

Kryetari i komunës, Isni Kilaj, ka kërkuar nga kjo drejtori, që të kontaktohen të gjitha vendbanimet dhe të verifi kohet me saktësi situata e krijuar ditëve të fundit, dhe për nevojat eventuale të banorëve.

Kilaj, po ashtu ka kërkuar edhe nga Drejtoria e Shëndetësisë, që të kontaktohen udhëheqësit e fshatrave që shtrihen në vargmalet e Berishës dhe nëse kanë nevojë për shërbime emergjente mjekësore, të dërgohen ekipet e shërbimit të emergjencës nga Qendra Kryesore e Mjekësisë Familjare, për t’u dalë në ndihmë banorëve në nevojë.

Veriorët ballafaqohen me barrikada dhe borë

Rrugët në territorin e komunës së Mitrovicës janë të kalueshme, përfshirë këtu edhe ato në zonën e Shalës dhe të Bajgorës. Kreu i Komunës së Mitrovicës, Avni Kastrati, ka thënë se bora e madhe që ka rënë ditëve të fundit ka krijuar vështirësi të mëdha në qarkullim.

Sipas tij, problemet më të mëdha i kanë banorët e veriut të vendit, të cilët pos me barrikada tash kanë vështirësi edhe për qarkullim për shkak të borës së madhe. Ai ka thënë se komuna është e mobilizuar për zhbllokimin e të gjitha rrugëve, duke përfshirë edhe ato në zonat më të thella malore.

Kastrati ka thënë se komuna ka ndihmuar me një kontingjent ushqimesh javën që shkoi banorët e tre fshatrave shqiptare të komunës së Leposaviqit, të cilët janë në gjendje më të rëndë.

Drejtori për Mbrojtje dhe Shpëtim, Behxhet Bala, ka thënë se drejtoria të cilin ai e drejton është mobilizuar për t’u përballur me këtë situatë. Ai tha se kanë angazhuar pesë kompani, të cilat janë duke punuar për të mos lejuar bllokimin e rrugëve.

Klinasit sfidojnë dimrin siberian

Në kohën kur shumë komuna fqinje kanë shpallur gjendje të jashtëzakonshme, zyrtarët komunalë të Klinës janë mobilizuar që t’i bëjnë ballë dimrit të ashtuquajtur “siberian”. Drejtoria komunale e Emergjencës ka mobilizuar të hënën zjarrfi kësit e kësaj komune të cilët kanë bërë pastrimin e rrugëve, trotuareve dhe ambienteve më të rëndësishme për qytetarët.

Esat Rraci, drejtor për emergjencë të Klinë, thotë se “Klina për momentin nuk e ka ndërmend të shpallë gjendje të jashtëzakonshme, pasi që rrugët e kësaj komune janë të kalueshme. Gjendja më e vështirë, sipas tij, paraqitet në fshatrat: Poterq, Ranoc dhe zonat më të thella, por falë kompanisë për pastrimin e rrugëve “Vemor” gjendja është stabile, ka thënë Drejtori Rraci.

Dy fshatra të izoluar, apelohet për solidaritet

Si pasojë e të reshurave të mëdha të borës, dy fshatra dhe një lagje në një fshat tjetër të komunës së Kaçanikut, kanë mbetur të izoluara, ndërkohë që në dy lokalitete të tjera ka vështirësi të theksuara. Vështirësitë në qarkullimin e njerëzve dhe automjeteve janë evidente edhe në lokalitete të tjera.

Kjo gjendje është raportuar të jetë e tillë në takimin e Këshillit Komunal të Sigurisë në Bashkësi në Kaçanik. Rushan Ceka, drejtor i Drejtorisë së Emergjencës dhe Shërbimeve Publike, ka thënë se fundjavën që lamë pas janë hapur rrugët e fshatrave të tjera të kësaj komune.

“Ka pasur kërkesa nga qytetarët edhe për zhbllokimin e rrugëve të lagjeve, por vëllimi i të reshurave të borës dhe nevojat emergjente në rrugët kryesore, nuk na e lejon mundësinë e intervenimeve nëpër lagje”, ka sqaruar drejtori Ceka.

Edhe kryetari i Komunës, Xhabir Zharku, e ka komentuar gjendjen si të tillë, ndërsa duke iu referuar parashikimeve për të reshura të reja, ka ftuar policinë që të marrë aksion për largimin e automjeteve të parkuara qe një kohë të gjatë në rrugët e qytetit.

“Pronarët e automjeteve të parkuara në rrugë, duhet t’i largojnë nga aty dhe t’i parkojnë në oborret e tyre”, ka sugjeruar fillimisht kryetari Zharku.

Tekstit i kanë kontribuuar: C. Mazrekaj, K. Sallahu, S. Haxhaj, B. Abazi dhe N. Krasniqi