(E plotësuar) Është publikuar sot spoti televiziv për promovimin e vendit në rrjetin më të madh mediatik amerikan, CNN. Siç është raportuar edhe më herët, për këtë projekt, Qeveria e Kosovës do të paguajë një milion euro.

Ministrja e Tregtisë dhe Industrisë, Mimoza Kusari-Lila, pati thënë se kjo fushatë do të fillojë më 17 shkurt, në katër vjetorin e pavarësisë së Kosovës, megjithëse fushata nisi 2 ditë më herët.

Ajo pati thënë se viteve të fundit, Kosova ka ndërmarrë një numër të fushatave promovuese, megjithatë, sipas saj, “këto kanë rezultuar me nevojën për vazhdimin e promovimit qoftë në nivelin politik, qoftë në atë të investimeve”.

Fushata e re mediatike, sipas saj, do të ketë për qëllim promovimin e potencialeve investive të Kosovës.

“Kjo fushatë do të fillojë më 17 shkurt në katër vjetorin e pavarësisë”, pati thënë Kusari-Lila.

Mirëpo, pak kohë pas publikimit të këtij spoti në mediet tona, dhe kur u shpërnda nëpër rrjete sociale, nisën reagimet për simbolin e pavarësisë, Newborn. Derisa ky simbol ishte vendosur para Pallatit të Rinisë dhe Sporteve në Prishtinë në ditën e shpalljes së pavarësisë së Kosovës, pak pas kësaj kohe shkronja B e këtij simboli ishte shndërruar në P, që lexohej NewPorn.

Për fat të keq, reklama(t) prej 1 milion euro të paguara nga Qeveria e Kosovës me para të taksapaguesve kosovarë, ka vendosur që pikërisht si imazh të përdorë po atë version të Newbornit, pra NewPorn.

E reagimi i ministres Kusari-Lila ka qenë i menjëhershëm. Ajo në profilin e saj në Facebook premtoi se ky gabim do të përmirësohet.

“Lajmi për reklamën e CNN-it u prezantua në të gjitha portalet deri sa nuk u vërejt ngjyrosja e shkronjës B me ngjyrë dhe shndrimi i saj në P gjë që rezultoi me reagime dhe ndërrim të qasjes për reklamën. Pagesa për CNN përfshin produksionin e tri reklamave, e para 15 sec për dy javë dhe dy tjera nga 30 sec me tematikë të promovimit të investimeve, njëra prej Marsit deri në fund të Qershorit dhe e treta deri në fund të vitit. Ajo çfarë po shihet tani do të korrigjohet, ndërsa të gjithë që duan të kontribuojnë në pjesët tjera të kampanjës mund të na kontaktojnë pa hezitim”, shkroi ministrja Kusari-Lila. /Zëri/

Më poshtë, mund ta shihni video-spotin e transmetuar në CNN: