58 familje të Restelicës, të cilat, pas ortekut tragjik të borës, janë zhvendosur nga zona e rrezikuar, të shtunën janë ndihmuar nga Kryqi i Kuq i Kosovës, në bashkëpunim me degën e Sharrit, ka bërë të ditur Muhamer Rexhepi, sekretar i degës së kësaj organizate.

“Nga zona e rrezikuar janë zhvendosur 58 familje, me 257 anëtarë. Meqë pjesa më e madhe e tyre janë në gjendje të vështirë ekonomike, ndihma për ta ka qenë emergjente”, ka pohuar Rexhepi. Ndërsa, Feride Hyseni, sekretare e përgjithshme e KK të Kosovës, ka theksuar se të dielën janë shpërndarë 30 pako ushqimore, 35 dyshekë, 10 stufa, 70 batanije dhe 70 pako me veshmbathje.

Sipas saj, drejtuesit e degës së KK dhe ata të Shërbimit të Emergjencës, në koordinim me përfaqësuesit e shtabit të krizës, në Restelicë, do të bëjnë vlerësimin e gjendjes ekonomike të familjeve të zhvendosura, ngase aksioni do të vazhdohet edhe javët e ardhshme.

“Ministria e Industrisë dhe Tregtisë ka ndarë një fond prej 50 mijë eurosh, me të cilat do të sigurohen pako ushqimore, higjenike e artikuj tjerë të domosdoshëm për 1.100 familje të rrezikuara në tërë vendin, ndërkaq në këtë komunë, prioritet do të kenë familjet e Restelicës, të zhvendosura nga zona e rrezikuar”, ka nënvizuar Hyseni.