Qytetarët e komunës së Drenasit, vazhdojnë të jenë në hall të madh me “Ferronikelin”, i cili tanimë është bërë kërcënuesi më i madh për shëndetin e tyre. Bora në trashësi të madhe, është shndërruar në ngjyrë të zezë dhe ky fakt i ka shqetësuar banorët, shtëpitë e të cilëve ndodhen në afërsi të këtij gjiganti kancerogjen, siç e quajnë “Ferronikelin” banorët e kësaj komune.

“Vazhdimisht kemi kërkuar që të ndërmerren masa ndaj ‘Ferronikeli’ për shkak të nivelit të lartë të ndotjes, të cilin është duke e shkaktuar. Kemi pasur edhe biseda me menaxhmentin e kësaj kompanie, kemi bërë edhe padi, janë shqiptuar edhe dënime, ndonëse ato kanë qenë të vogla, por situata mbetët e njëjtë“, ka thënë Nexhat Demaku, kryetar i Drenasit.

Ai theksoi se është koha e fundit që institucionet e shtetit të ndërmarrin masa ndaj ndotësit më të madh të mjedisit në Kosovës, sa nuk është bërë vonë. “Duhet të veprohet shpejt, sepse po rrezikohet shëndeti i banorëve”, ka thënë ai.

Në anën tjetër, drejtoresha e Inspeksioneve në Drenas, Hyrie Xhemaili-Thaçi, tha se “Ferronikeli” po që ndot ambientin, ndot edhe ujin.

“Inspektorët kanë konstatuar ndotje edhe të ujit, një nivel të lartë të ndotjes, ndërsa furrnaltat e “Ferronikelit” tani lirojnë tym të zi, i cili ka mbuluar edhe borën, duke e bërë atë të zezë. E gjithë kjo ka shkaktuar shqetësim të banorët, jo vetëm të shtëpive në afërsi të ‘Ferronikelit’, por edhe te qytetarëve të tjerë të kësaj komune. Gjjithëse është rrezikuar shëndeti i banorëve”, thotë ajo.

Ndërkaq, Smajl Dibrani, këshilltar komunal, i cili jeton në afërsi të “Ferronikelit”, ka deklaruar se situata është bërë tepër serioze dhe se nëse nuk ndërmirret diçka për të përmirësuar atë, atëherë protestat e banorëve do të jenë të pashmangshme.

“Nuk ka mbetur rrugë tjetër. Kërkesat tona përherë kanë qenë të qarta, edhe për menaxhmentin e ‘Ferronikelit’ edhe për institucionet e tjera. Kjo qe po ndodh tani, mund të na sjellë buzë katastrofës. Mbetjet që shpërndahen me tymin nga oxhaqet ta zënë frymën edhe nëpër dhoma të shtëpive. Dritarët nuk mund të hapen kurrë. Kjo borë tani duket e zezë. Këtë punë duhet ndaluar dikush, përndryshe, do të jenë qytetarët ata të cilët do ta bëjnë një gjë të tillë. Nuk ndreqen punët me fjalë, me premtime dhe me dënime që janë fare simbolike. Duhet veprim konkret i nivelit më të lartë të shtetit, sepse komuna nuk mund të bëjë shumë në këtë drejtim”, ka deklaruar Dibrani.

Për situatën në “Ferronikel” është deklaruar edhe kryparlamentari Jakup Krasniqi, i cili ka kërkuar intervenim të shpejtë për stabilizimin e gjendjes. Ai ka kërkuar nga qeveria që t’i lëvizë të gjithë mekanizmat që ka për ta sjellë gjendjen në suaza normale.

Në ndërkohë mësohet, se banorët e lagjeve të Drenasit në afërsi të “Ferronikelit” do të organizojnë protestë, të enjten, ndërsa pritet që atyre t’u bashkëngjiten edhe qytetarë të tjerë të kësaj komune.