Muajin e ardhshëm, nga data 8 deri më 10 mars, gratë lidere inspiruese dhe aktiviste nga mbarë globi, përfshi Presidenten e Kosovës, Atifete Jahjaga, aktoren me famë botërore, Angelina Jolie, fituesen e çmimit Nobel Leymah Gbowee, ish-shefen ekzekutive të Facebook, Sheryl Sandberg, aktoren e madhe, Meryl Streep, diplomaten amerikane, Madeleine Albright, shefen e FMN-së, Christine Lagarde e gra tjera të suksesshme në botë, do të mblidhen në qytetin e Nju Jorkut për Samitin e tretë vjetor Botëror të Grave për gazetën “Newsweek” dhe “The Daily Beast”.

Në këtë samit do të diskutojnë ish-diplomatja Allbright me aktoren Jolie rreth tematikës se si femrat ngriten në këmbët e tyre pas luftërave dhe si ato mbajnë familjen.

“Nga CEO dhe lidere botërore deri tek artiste, aktiviste dhe disidente të zjarrta, ne i tregojmë tregimet e femrave të guximshme dhe inteligjente të cilat përballen me status quon në vendet e tyre, duke i mbledhur pjesët e shpërndara në periudhën pas luftërave”, thuhet në njoftimin zyrtar të këtij samiti.

Ngjarja do të zhvillohet në Qendrën “Lincoln”, dhe do të zgjas tri ditë ku do të diskutohen sfidat urgjente me të cilat përballet femra sot.

Temat që do të diskutohen në këtë samit do të variojnë nga një nuse pakistaneze e cila u largua nga prospekti i një martese të detyruar e të dhunshme deri tek shoqëritë seksiste.

Në fund të këtij samiti do të bëjë një prezantim edhe aktorja, fituese e çmimit Oskar, Meryl Streep. /Zëri/