Prishtinë. Të martën, rreth orës 17:15, një zyrtar policor, që ishte jashtë detyre dhe në rroba civile, me veturën e tij civile kishte shkuar në Parkun e Gërmisë në Prishtinë, te vendi i quajtur “tek antena”.

Derisa i njëjti po qëndronte atje, një i dyshuar i armatosur me një revole të tipit TT dhe i maskuar i ishte afruar policit nga dera e pasagjerit duke i kërkuar të holla. I dyshuari, pasi që grabit një telefon mobil nga brendia e veturës, e sulmon policin duke i shkaktuar lëndime trupore.

“Në bazë të hetimeve fillestare, besohet se pas kësaj, polici e nxjerr revolen e tij, dhe pasi që personi i maskuar dhe i armatosur nuk i përfill urdhrat verbale dhe ligjore për ndalim, polici, në këtë rast viktima, e përdor revolen e tij zyrtare duke përdor forcën vdekjeprurëse në vetëmbrojtje duke qëlluar në të dyshuarin”, thuhet në një komunikatë për media të lëshuar nga Policia e Kosovës.

“Pas kësaj, njësitet patrulluese kanë dalë menjëherë në vendin e ngjarjes përderisa ekipi mjekësor që kishte ardhur aty konfirmoi vdekjen e të dyshuarit që kishte sulmuar policin”.

Sipas raportit të policisë, në vend të ngjarjes menjëherë kanë dalë edhe Prokurori i Qarkut dhe njësitet e tjera, si mjekësia ligjore, forenzika, hetuesit rajonalë, zyrtarë nga EULEX-i si dhe eprorë të lartë të PK-së nga drejtoria Rajonale e Prishtinës.

Hetimet për këtë rast do të zhvillohen nga Drejtoria e Krimeve të Rënda nga Drejtoria e Përgjithshme e Policisë në Prishtinë.

Pas ekzaminimit të vendit të ngjarjes, që është në proces e sipër, Policia e Kosovës do të jep detaje të tjera shtesë për këtë incident.