Prishtinë. Moszbatimi i rekomandimeve të Avokatit të Popullit nga institucionet e Kosovës vazhdon të mbesë njëra nga vështirësitë dhe sfidat më të mëdha me të cilat ballafaqohet ombudspersoni. Këto vlerësime dolën të hënën gjatë një debati për Avokatin e Popullit organizuar nga Lëvizja FOL.

Pas prezantimit të raportit për punën gjatë vitit 2029 të Avokatit të Popullit, Hilmi Jashari zëvendësombudsperson, ka vlerësuar se bojkotimi i rekomandimeve të këtij institucioni ka të bëjë me zhvillimin e demokracisë nëpër institucione.

Ai thotë se është bërë praktikë që sa herë Avokati i Popullit e ngrit zërin për shkeljen e të drejtave të qytetarëve, pasojnë deklaratat nga qeveria, me të cilat, sipas tij, pretendohet të amortizohen pohimet, duke dhënë arsyetime jokorrekte dhe të pasakta.

“Në demokracitë e zhvilluara kjo nuk ndodhë. Është një vetëdije e përgjithshme që vlerësimet e Avokatit të Popullit edhe ligjërisht nuk mund të debatohen, nuk mund të diskutohen, nuk mund të sfidohen. Ato janë përfundimtare, ose duhet të zbatohen ose mos të zbatohen, por në rast se nuk zbatohen, reperkusionet pastaj janë më të mëdha, në këtë rast nga Kuvendi”, thotë ai.

Ndërsa drejtori ekzekutiv i Lëvizjes “FOL”, Ramadan Ilazi, thotë se Raporti i Progresit vazhdimisht ka vënë në pah se tek institucionet publike të Kosovës mungon respekti për Avokatin e Popullit, përkatësisht për raportin që ky institucion publikon për çdo vjet.

“Katër deri në pesë ankesa në dite zyrtarisht deponohen te ky institucion, që kanë të bëjnë me abuzim me autoritetin publik”, thotë ai, duke theksuar se institucionet janë duke dështuar në zbatimin e rekomandimeve të Avokatit të Popullit.

Ndërkaq vetë Avokati i Popullit, Sami Kurteshi të hënën ka prezantuar raportin e punës së këtij institucioni para deputetëve të Kuvendit të Kosovës, ndërsa ka vlerësuar se në Kosovë ka shkelje të mëdha të drejtave të njeriut, ndërsa ka theksuar se jofunksionaliteti i institucioneve të drejtësisë mund të ketë pasoja të rënda për shoqërinë.

“Shumë brengosëse është humbja e besimit tek drejtësia dhe gjyqësori në Kosovë dhe kjo është e drejtë. Besimi në drejtësi do të kthehet vetëm atëherë kur askush nuk është mbi ligjin”, ka thënë ai. Raporti Avokatit të Popullit është miratuar nga ligjvënësit kosovarë, të cilët janë pajtuar se institucionet po i shkelin të drejtat e njeriut.