Ferizaj. Pas përfundimit me sukses të stërvitjeve bazike, në Komandën e Doktrinës dhe Stërvitjes në Ferizaj, të hënën u certifikuan 184 rekrutë të rinj të Forcës së Sigurisë të Kosovës, prej tyre 55 janë pjesëtarë të komuniteteve pakicë. Diplomimi i këtyre kadetëve u konsiderua hap i rëndësishëm në zhvillimin dhe profesionalizmin e FSK-së.

Gjenerali Enver Cikaqi, komandant i QSD-së në Ferizaj, ka njoftuar se në radhët gjeneratën së parë të rekrutëve të FSK-së, janë rreshtuar edhe 55 pjesëtarë të minoriteteve që jetojnë në Kosovë, prej tyre 19 janë boshnjakë, 17 turq, 8 serbë, gjashtë egjiptian, 4 ashkali dhe 1 rom.

“Për tetë javë sa kanë zgjatur trajnimet bazike, këta rekrutë u aftësuan, fituan njohuri të përgjithshme të artit ushtarak, duke kaluar të gjitha sfidat e planifikuara të ushtrimeve, me qëndrueshmëri fizike, përgatitje të lartë psikologjike, nivel të kënaqshëm intelektual, të përkushtuar për t’i përdor të gjitha këto vlera në të mirë të FSK-së dhe vendit në përgjithësi”, tha Cikaqi.

Komandanti i përgjithshëm i Forcës së Sigurisë së Kosovës (FSK), gjenerallejtënant Sylejman Selimi ka theksuar se tashmë kjo forcë po i plotëson të gjitha kapacitetet e parapara, me një kujdes të veçantë për shkollimin, edukimit dhe trajnimit të kuadrove të reja, si brenda ashtu edhe jashtë vendit. “Rekrutët e certifikuar do të rreshtohen në të gjitha njësitë e FSK-së, si forcë gjithëpërfshirëse, për të vazhduar në përmbushjen e detyrave fisnike në shërbim të qytetarëve, në Republikën e Kosovës”, ka nënvizuar Selimi, i cili u ka përkujtuar ushtarëve të rinj, se pas trajnimeve bazike, duhet të përpiqen në vazhdimësi, rreth ngritjes profesionale, të udhëhequr nga tri vlera fondamentale: detyra, nderi dhe atdheu.

Në anën tjetër ministri i FSK-së, Fehhmi Mujota i ka përgëzuar rekrutët e rinj si dhe oficerët që kanë punuar me një motiv të lart ushtarak dhe profesional, sipas kritereve dhe standardeve të NATO-s. “Jemi të vendosur që nën këshillat dhe përkujdesjen e drejtpërdrejt të NATO-s, po punojmë me përkushtim për ngritjen, kompletimin dhe aftësimin profesional të FSK-së, si institucion, me synime të qarta, të përshkruara me Kushtetutën dhe ligje të Republikës së Kosovës”, ka thënë ministri Mujota.

Rekrutët më të suksesshëm janë nderuar me mirënjohje nga komandanti i KFOR-it gjenerali Markus Bentler.