Prishtinë. Ministria e Punëve të Brendshme (MPB) është duke i shkelur të drejtat e qytetarëve, konkretisht të atyre që kanë zgjedhur të drejtojnë vetura me timon në anë të djathtë.

Këtë veprim, për më saktësisht është duke e ndërmarr Qendra për Regjistrimin e Automjeteve që vepron në kuadër të MPB-së, zyrtarët e së cilës po i obligojnë qytetarët që të paguajnë gjoba si dëmshpërblim që nuk i kanë regjistruar veturat e tyre gjatë periudhës së kaluar.

Kështu, taksa që aplikohet për veturat e zakonshme që nuk janë regjistruar “për dëshirën” e qytetarëve, vazhdon të praktikohet edhe për personat të cilët janë pamundësuar t’i regjistrojnë veturat, ngase vendimi i MTPT-së ua ka ndaluar për një periudhë, regjistrimin e automjeteve me timon në anë të djathtë.

Avokati i Popullit, Sami Kurteshi thotë se duke i detyruar që të paguajnë gjobë, MPB-ja është duke realizuar edhe një shkelje të të drejtave të njeriut.

“Po kjo është shkelje. Bile është shkelje e rëndë për arsye se prej një vendimi të paligjshëm që mos t’i regjistrojnë shkojnë në zbatimin të një vendimi tjetër të paligjshëm, që është gjoba”, thotë ai.

Shkeljen e të drejtave të njeriut ai e bazon në faktin se nuk është faji i qytetarëve që nuk i kanë regjistruar veturat e tyre, por sipas tij, faji qëndron tek institucionet që kanë marrë vendime për ndalesën e regjistrimit.

“Shkelja e ligjit nuk mund të pasohet me një shkelje tjetër”, thekson ai.

Ndërkohë, zyrtarë të Ministrisë së Transporteve nuk duan të merren shumë me këtë çështje, pavarësisht se kjo ministri ka marrë vendim që ta ndalojë regjistrimin e veturave në fjalë, ndërsa më pas e ka ndryshuar këtë vendim.

Shefi i kabinetit të ministrit të Transporteve, Endrit Shala, thotë se nuk është në gjendje të konfirmojë nëse ministri i Transportit, Fatmir Limaj dhe ai i Punëve të Brendshme, Bajram Rexhepi, do të nënshkruajnë ndonjë memorandum mirëkuptimi që i liron pronarët e veturave me timon në anë të djathë nga ky detyrim.

Rreth një memorandumi nuk japin sqarime as zyrtarët e Ministrisë së Punëve të Brendshme.

Zëdhënësja e kësaj ministrie, Dafina Myrtaj, thotë se MPB-ja është njoftuar të premten nga Ministria e Transporteve që shumë shpejtë do të ndërpritet kjo formë e gjobës për personat që kanë vetura me timon në anë të djathtë.

“Këtë njoftim shumë shpejt do ta kemi edhe me shkrim. Tani e tutje, qytetarët që kanë timonin në anën e djathtë, në momentin kur dëshirojnë të bëjnë regjistrimit të automjetit, duhet që me vete të kenë një do kument që do të dëshmojë që timonin e ka në anën e djathtë”, thotë ajo.

Ndërkohë, qytetarët vazhdojnë të paguajnë gjobën në fjalë.

Ideal Rexha, është vetëm njëri nga ta. Ai thotë se është habitur kur ka dëgjuar nga punëtorët e Qendrës për Regjistrimin e Automjeteve që duhet të paguaj gjobë ngase po e regjistron veturën disa ditë pasi kanë kaluar një muaj “pushimi”.

Ai kujton se pasi është obliguar që të paguajë gjobën, nga punëtorët e qendrës është këshilluar që të ankohet në Ministrinë e Transporteve, ngase kjo ministri ka lëshuar vendimin për ndalesën e regjistrimit të veturave.

Rexha është i bindur se me këtë veprim, institucionet e vendit janë duke shkelur të drejtat e tij dhe “kolegëve” të tij, që drejtojnë vetura me timon në anë të djathë.

BOX:

S’ka kthim të parave

Avokati i Popullit, Sami Kurteshi, thotë se dikasteret qeveritare janë të obliguara t’i kthejnë parat të gjithë personave që sipas tij ua kanë vjedhur.

“Mendoj se duhet t’0u kthehen. Nëse nuk ua kthejnë, atëherë është plaçkitje e paligjshme e qytetarëve”, thotë ai.

Por, zëdhënësja e MPB-së, Dafina Myrtaj, thotë se kjo nuk do të ndodhë. Ajo thekson se pagesa e gjobës prej 20 euro ka qenë në fuqi kur janë paguar të hollat, prandaj nuk do të kthehen paratë.

Sipas saj, kjo nuk do të ndodhë me qytetarët që i regjistrojnë tash e tutje, përkatësisht nga fillimi i implementimit të rregullit të ri.