Mungesa e nënkalimeve dhe mbikalimeve në rrugët e kryeqytetit po rrezikon jetën e qytetarëve. Për aksidentet qytetarët të mllefosur kritikojnë zyrtarët komunalë, të cilët, sipas tyre,deri tash nuk kanë krijuar mënyra më të lehta dhe më të sigurta për qarkullim.

Vendi më i rrezikshëm për kalimtarët është “Te Rrethi”. Përballë këtij rreziku për çdo ditë janë banorët e lagjes “Emshir”, si edhe të disa blloqeve banesore të ngritura pranë rrugës magjistrale. Një rrezikshmëri të lartë për qytetarët paraqet edhe rruga e njohur “Xhamia e Llapit”. Arjeta Behrami, e cila çdo ditë kalon në rrugën te “Xhamia e Llapit”, flet e mllefosur për mungesën e një vendi të sigurt për këmbësorët.

“Rruga është e rregulluar mirë, mirëpo asnjëherë punët Komuna nuk i çon deri në fund. Nënkalimet dhe mbikalimet është dashur të ndërtohen paralelisht me punët në rrugë. Por, kjo nuk është bërë”, thotë ajo.

Përgjegjësinë për këtë hall të qytetarëve nuk e pranojnë zyrtarët komunalë. Shefi i sektorit në Drejtorinë për Infrastrukturë Lokale në Komunën e Prishtinës, Refik Sadiku, tha se Ministria e Transportit ka pasur obligim t’i ndërtoj dy mbikalime, një në magjistralen afër “Termokosit”, dhe një në lagjen Emshir, afër stacionit të autobusëve. Këto zvarritje, sipas tij, janë bërë pasi ka probleme pronësore, kurse komuna është duke punuar për zgjidhjen e këtij problemi.

Përkundër ankesave, shefi i Drejtorisë së Infrastrukturës , Sadiku, flet me optimizëm se prioritet i komunës është ndërtimi i tri mbikalimeve.

“Ne si prioritet i kemi tri mbikalime, një te rrethi, afër Shkollës së Mesme të Mjekësisë, një te ‘Xhamia e Llapit’, dhe një te shkallët në lagjen ‘Arbëria’”, tha ai.

Sipas tij, këto vepra parashihet të ndërtohen me koncesion. Ata që fitojnë koncesionin, hapësirat e tjera mund t’i përdorin për qëllime komerciale.

Por fillimi i ndërtimit dhe që qytetarët pa rrezik të kalojnë magjistralet më të frekuentuara, Sadiku tha se varet sipas mundësitë e Zyrës së Prokurimit.

“Sipas mundësive, kur zyra e prokurimit e shpallë tenderin dhe të përzgjidhet fituesi, nisë realizimi i këtyre projekteve”, thotë Sadiku, por nuk jep shumë shpresë se ndërtimi mund të fillojë sivjet.

Sipas tij problem është deri sa të përgatitet dokumentacioni dhe të lajmërohen koncensionarët. Por shpreson se punët nuk do të shkojnë më larg se deri në vitin 2011.

Ai shprehet i bindur se me ndërtimin e këtyre tri mbikalimeve do të bëhet një zgjidhje shumë efektive.

Po ashtu, në Prishtinë janë duke u hapur edhe dy nënkalime. Njëri, ai pranë godinës së KEK-ut është duke u financuar nga komuna, kurse tjetrin te rrethrrotullimi në lagjen “Lakërishte”, është duke e ndërtuar Ministria e Transportit dhe e Telekomunikacionit.