Edhe pse operacioni për eliminimin e qenve endacakë në qytetet tjera ka filluar më herët, në kryeqytet, sipas zyrtarëve komunalë, pritet të fillojë në muajt e vjeshtës. E, përderisa komuna të fillojë këtë aksion, qentë endacakë vazhdojnë të shëtisin lirshëm në qendër të qytetit, e sidomos në lagjet periferike. Ky operacion që do të fillojë në vjeshtë, do të bëhet në të gjitha lagjet e qytetit, gjithashtu edhe në fshatrat e komunës së Prishtinës. Përderisa numri i qenve është në rritje qytetarëve vazhdon t’iu rrezikohet jeta, e sidomos fëmijëve, të cilët shkojnë në shkollë herët në mëngjes.

Kryeqytetasi, Agron Ismaili tregon se edhe pse ka pasur aksione për eliminim e qenve endacakë nga kryeqyteti, përsëri ata shihen në çdo qoshe të rrugëve.“Sa më kujtohet mua, ka pasur aksione për eliminimin e qenve endacakë, pasi që ata janë rrezik për këmbësorët, të cilët përshkojnë rrugët e kryeqytetit, por përsëri i sheh gati në çdo qoshe që shëtisin të lirë”, thotë ai. Por, sipas tij, më të rrezikuarit nga qentë janë fëmijët e vegjël, të cilët në mëngjes shkojnë në shkollë. Edhe pse eliminohen për çdo vit qentë endacakë, prapëseprapë është e pamundur të mos rritet numri i tyre, thotë një qytetar nga Lagjja e Spitalit.

“Unë sa herë që shkoj në punë, shoh grumbuj qensh në rrugë. Shpresoj se sadopak të zvogëlohet numri i tyre, por është e pa mundur të mos shohësh qen në rrugë. Nganjëherë nuk sheh vetëm qenë endacakë, ka raste kur edhe qen shtëpiakë lirohen nga pronarët dhe dalin në rrugë, dhe kjo është mjaft e rrezikshme. Edhe Dren Miftari, 10-vjeçar, i cili banon në lagjen “Rruga e Bledit”, tregon se edhe në mëngjes, por edhe në mbrëmje, i bie të hasë në qen të cilëve ua ka frikën.

“Qentë endacakë shihen çdoherë, si në mëngjes, si në mbrëmje. Ka raste kur shkoj të blej diçka apo edhe kur shkoj në shkollë, shoh disa qen, dhe ua kamë frikën”, thotë Dreni.

Përderisa ai flet për qentë, ndalet dhe kujton disa raste që ka dëgjuar lidhur me qentë endacakë, ku shumica kanë përfunduar me vdekje nga kafshimi i qenve.“Kam dëgjuar për një rast, kur një djalë i vogël, nga kafshimi i qenit ka vdekur, dhe me të vërtetë ua kam frikën”, thotë ai.

Sipas Asdren Osajt, këshilltar për medie i kryetarit të Prishtinës, Isa Mustafa, operacioni për eliminimin e qenve endacakë, pritet të fillojë në vjeshtë.

“Sivjet është planifikuar që eliminimi i qenve endacakë të bëhet në vjeshtë. Qytetarët si gjithmonë do të njoftohen me kohë për orën dhe lagjen e caktuar, ku bëhet eliminimi i qenve endacakë. Por, në cilin muaj saktësisht do të fillojë ky operacion, Osaj tha se e tërë kjo varet prej procedurave të tenderit. Ai shtoi se eliminimi i qenve endacakë në kryeqytet bëhet vazhdimisht në faza të caktuara.

“Ka rast kur këto operacione për eliminimin e qenve endacakë bëhen nga një apo dy herë në vit, por ka raste kur bëhen disa herë në bazë të kërkesave të qytetarëve”, tha ai.