Prishtinë. Komuna e Prishtinës e ka rrafshuar për tokë të hënën biznesin e shitjes së vajrave me pakicë “Bingo Benz 2”. Fillimisht pronarit të lokalit i është tërhequr vërejtja nga komuna se në mënyrë ilegale ka vendosur rezervuarë të derivateve të naftës për të cilat nuk ka pasur leje. Por, atij i është rrënuar edhe objekti i derivateve të vajrave që vetë inspektorati komunal e ka pajisur me leje.

Në lejen e punës lëshuar nga komuna e Prishtinës thuhet se “Shoqërisë tregtare “Bingo Benz” SH P K, njësia nr. 3 nga Prishtina rruga “Lidhja e Lezhës”, nr. p.n, me numër regjistrimi të biznesit 70397392, i datës 09.01.2009, të cilën e përfaqëson Ukshin Menxhiqi nga Prishtina, i lejohet të ushtrojë veprimtarinë ekonomike të regjistruar pranë MTI-së me shifrën 5050 dhe emër tregtia me pakicë e vajrave. Leja e punës vlen deri më 22.1.2011”.

Ndërkaq, ka reaguar pronari Menxhiqi. Ai ka thënë se i posedon të gjitha lejet.

“Rrënimin e objektit ma ka bërë kryetari Isa Mustafa me qëllim, vetëm pse është afër shtëpisë së tij. Unë për lokalin e derivateve të naftës posedoj edhe dokumente të lëshuara nga komuna që i përmbushë çështjet e sigurisë, madje për të kam pasur leje deri në 2011. Por, kur ta merr inat Isa, kështu të gjen”, tha ai.

Ndërkaq, inspektorati komunal ka thyer ligjin për Inspeksionin e Tregut, ngase ata pronarit Menxhiqi më 26 gusht i kanë lëshuar një procesverbal, në të cilin thuhet se “obligohet pronari Ukshin Menxhiqi që në afat menjëherë të bëjë largimin e rezervuarëve të naftës, ngase nuk posedon leje nga inspektorati komunal”.

Ndërkaq në Ligjin nr. 02/L-1 për Inspeksionin e Tregut, nuk ka nen që thuhet se, duhet të largohen derivatet në afat menjëherë. Në nenin 47 thuhet se Inspeksioni i tregut duhet të marrë vendim dhe palën ta njoftojë me vendimin e marrë në afat prej 8 ditësh, nga dita e përpilimit të procesverbalit. Inspektorati ka reaguar pas 10 ditësh. Ndërkaq, autoritetet komunale kanë thënë se pompën e biznesin e kanë rrënuar për faktin se pronarit të “Bingo Benz 2” i është tërhequr vërejtja disa herë, për vendosjen e derivateve të naftës ilegalisht.

“Rrënimi i objektit të benzinës "Bingo Benz 2" është bërë për faktin se ajo do të mund të paraqiste rrezik për qytetarët. Ajo është shumë afër vendbanimeve. Edhe pompat e tjera të benzinës që janë afër vendbanimeve dhe që konsiderohet se e rrezikojnë sigurinë e qytetarëve, do të rrënohen”, ka thënë Muhamet Gashi, zëdhënës në komunën e Prishtinës.

Por, që nga deklarata e nënkryetarit të komunës Avdullah Hoti në qershor se komuna do t’i rrënojë pompat e benzenit në afërsi të vendbanimeve, e deri më sot, kjo pompë është e para që është rrënuar, ndonëse nuk ka qenë pompë e benzinës. Pompa e benzinës ishte bërë mollë sherri në mes komunës së Prishtinës dhe Ministrisë së Tregtisë dhe Industrisë, me ç’rast komuna pat shembur pompën e derivateve të naftës edhe përkundër faktit se MTI i pat lëshuar licencë për biznes në sektorin e naftës.