Nxënësit e klasës 12/8, të gjimnazit “Sami Frashëri”, në kryeqytet të enjten dhe të premten kanë ndërmarrë një aksion solidariteti duke kërkuar ndihmë për shokun e klasës Meriton Beka, i cili lëngon nga sëmundja e rëndë e leukemisë dhe ka nevojë për shërim jashtë vendit. Ata me aksione në sheshin e Prishtinës dhe në disa kompani kanë mbledhur ndihma për dërgimin e 18-vjeçarit sa më shpejt në ndonjërën nga klinikat e njohura evropiane, ku mund të gjej shpëtimin.

Nxënësit e rinj në moshë, por të pjekur e solidar janë organizuar si kurrë më parë për të ndihmuar shokun. Dikush i bie kitarës për të tërhequr njerëz për të lënë ndonjë euro cent ndihmë, dikush duke ndalur kalimtarët dhe duke ua shpjeguar rastin, e disa të tjerë duke vendosur shkrime në tendën e vendosur në shesh.

“Ta shpëtojmë shokun tonë nga Leukemia”, ishte shkruar në gjuhën shqipe dhe angleze, në tendën e vendosur në shesh, të cilën Kryqi i Kuq ua ka dhuruar me të marrë vesh për këtë rast.

Të njomë në fytyrë, por me dëshirë të madhe për ta ndihmuar Meritonin, klasa 12/8 të enjten dhe të premten kanë marrë këtë iniciativë.

“Kur e kemi kuptuar se shoku ynë vuan nga sëmundja e leukemisë menjëherë kemi marrë nismën për të mbledhur të hollat, sepse kemi dëgjuar se operacioni kushton 120 mijë euro, shumë tepër e madhe për një familje”, tha Labinot Avdiu, shok në klasën e Meritonit. Ai edhe kitarën e tij e kishte marrë si mjet për të siguruar të holla për t’i ndihmuar.

Vetëm ditën e enjte, nga ora 10:00 e mëngjesit e deri në mesnatë ata kanë mbledhur rreth 5800 euro. Ai tregon se ndihmë kanë kërkuar edhe në kompani të ndryshme dhe flet për raste kur ka hasur edhe në njerëz në pozita të larta që me injorancë kanë kaluar afër tendës dhe nuk u ka dalë asnjë cent nga xhepi.

“Pak më herët kaloi këtu afër një nga ata “të mëdhenjtë”. Na shikoi por nuk e la asnjë cent”, tha ai. Labinoti por edhe të tjerët shprehen të kënaqur me qytetarët që kanë ndihmuar. Ai gjithashtu tha se shumë këngëtarë kanë shprehur dëshirën të bëjnë muzikë sonte (premten), në shenjë solidariteti për ta ndihmuar Meritonin. Gjimnazistët shprehen të bindur se kjo iniciativë do t’u shkojë mbarë.

“Kemi deshtë ta ndihmojmë shokun tonë, që sa më shpejt të shërohet dhe të kthehet në mesin tonë “, tha Avdiu.

Drejtori i gjimnazit, Osman Beka thotë se Meritoni nuk ka qenë mirë me shëndet që gati një muaj porse vuan nga leukemia është kuptuar pas analizave, javën e kaluar. Ai tregoi se disa nga nxënësit e klasës së Meritonit kanë shkuar në klinikën, ku ai ka kryer analizat dhe drejtpërsëdrejti nga mjekët ku është kontrolluar Meritoni kanë mësuar nga cila sëmundje vuan ai. Se është një sëmundje e rëndë që mund të kushtojë me jetë dhe menjëherë janë organizuar, me vetiniciativë. Ai flet me mburrje për këtë iniciativë të nxënësve të këtij gjimnazi.