(E plotësuar) Ish-ministri i Transportit dhe Postë-Telekomunikacionit, Fatmir Limaj, thotë se ndaj tij po zhvillohet procesi i “linçimit publik”. Drejtësia në Kosovë, sipas tij, po vepron në mënyrë selektive dhe si në kohën e komunizmit.

Në një intervistë ekskluzive dhënë për gazetën “Zëri”, Limaj thotë se vendi ynë ka nevojë për një drejtësi perëndimore, ku në fund do të fitojë e vërteta.

“Ky është linçim publik dhe nuk ka të bëjë asgjë me drejtësinë. Në të kaluarën, në sistemin komunist kur ju keni dashur ta rrënoni një personalitet, ka mjaftuar një propagandë e linçimit publik dhe ka përfunduar në burg”, thotë Limaj.

Ish-ministri i Transportit nuk ka dashur ta komentojë shkuarjen e kryeprokurorit të EULEX-it, Wreeswijk, por është shprehur i bindur se akuzat e ngritura ndaj tij për korrupsion janë të pabaza. “Unë vazhdoj të mbaj atë qëndrimin që kam pasur qëkur kam qenë në Ministrinë e Transportit. Nuk do të mund të gjejnë asnjë gjë që është kundërligjore ose keqmenaxhim, ose keqpërdorim të fondeve dhe pres që këtë ta thotë edhe EULEX-i”, është shprehur Limaj.

Ish-komandanti i UÇK-së ka folur edhe për akuzat e ngritura për zhvillimet që kanë ndodhur gjatë luftës në Kosovë. Duke mos hyrë shumë në detaje të ngjarjeve që kanë ndodhur në atë kohë, ai ka thënë se drejtësia në fund do ta thotë të vërtetën.

Sipas tij, mënyra se si po pretendohet të zhvendoset drejtësia nga gjykatat në medie dhe në opinion publik, në mënyrë që opinioni publik ta gjykojë të vërtetën, i takon sistemit të kaluar - komunizmit.

Limaj ka folur edhe për qeverisjen Thaçi II, ku nuk munguan kritikat e shumta. Sipas tij, deri tani kjo qeverisje nuk ka dhënë rezultatet e duhura.

“Kjo qeveri nuk është ndërtuar mbi prioritete, por mbi bazën e interesave të individëve”, tha Limaj, duke shtuar se përgjegjësinë për sukses ose mossukses e ka kryekëput kryeministri Hashim Thaçi. Ai e ka mohuar mundësinë e krijimit të një partie të re që do të përbëhej nga disa njerëz të PDK-së, si Limaj, Jakup Krasniqi dhe të tjerë të pakënaqur brenda partisë.

Ish-ministri parashikon se Kosova këtë vit do të jetë në suficit, që siç e quan ai të rrejshëm, derisa viti 2012 dhe 2013 do të jenë vite të krizës për Kosovën.

Limaj si rrezik të madh për Kosovën e sheh synimin e Serbisë për të nxjerrë një status special për serbët e Kosovës, e cila autonomi do ta paralizonte shtetin tonë.

Marketing politik e jo zbatim i ligjit

Zëri: Sigurisht që jeni të njoftuar se kryeprokurori i EULEX-it, Wreeswijk do të largohet nga Kosova. Ai ka qenë personi që i ka nisur hetimet për korrupsion në Ministrinë e Transporteve, por si duket po shkon pa rezultat. Çfarë ka ndodhur në atë kohë dhe ku është gjendja tash lidhur me këto hetime?

Limaj: Ju e dini se ish-kryeprokurori i ka eprorët e tij, është punëtor i EULEX-it dhe unë nuk e vlerësoj punën e tij, e vlerësojnë organet të cilat e kanë emëruar dhe për të cilat ka punuar. Kjo është çështje e brendshme e vetë EULEX-it dhe i mbetet opinionit publik ta vlerësojë punën e tij.

Ndërsa, në raport me kryeprokurorin nuk ka asgjë të re nga ajo që ka ndodhur një vit e gjysmë më parë. Unë vazhdoj të mbaj atë qëndrim që kam pasur që në Ministrinë e Transportit. Nuk do të mund të gjejnë asnjë gjë që është kundërligjore ose keqmenaxhim, ose keqpërdorim të fondeve dhe pres që këtë ta thotë edhe EULEX-i. Pra, rezultatet përfundimtare të vijnë në këtë përfundim.

Zëri: Wreeswijk kishte deklaruar se do të fusë prapa grilave shumë politikanë. Si ish-ministër dhe si politikan largimin e tij e shihni të ndërlidhur me misionin të cilin ai nuk ka arritur ta përfundojë?

Limaj: Unë mendoj se drejtësia nuk duhet të shikohet ashtu. Kosova ka nevojë për drejtësi, Kosova ka nevojë për shtet ligjor. Po në emër të shtetit ligjor dhe në emër të drejtësisë, kushdo që e shkel shtetin ligjor, rregullat ligjore, drejtësinë, do të përgjigjet për veprimet e veta.

Nëse mendoni ju se këtu duhet të vijnë sisteme të kërcënimeve të tilla, mendoj se kjo nuk ka të bëjë asgjë me drejtësi. Atëherë është një kusht tjetër, të cilin nuk dua ta komentoj. Ajo që dua të them unë, është se Kosova, vendi ynë, shteti i ri, më shumë sesa për ajër dhe bukë ka nevojë për një drejtësi perëndimore. Fatkeqësisht unë ende nuk po shoh drejtësi perëndimore në vendin tonë.

Zëri: Çka nënkupton me drejtësi perëndimore?

Limaj: Me drejtësi perëndimore nënkuptoj dhe do të doja shumë që metoda, koncepti, zbatimi, respektimi i drejtësisë dhe implementimi i drejtësisë të jetë në parametrat e vendeve perëndimore. Do të doja që edhe vendi ynë të njihet me këta hapa dhe të instalohet një drejtësi e tillë.

Dhe prezenca e mekanizmit ndërkombëtar, EULEX-it, për të na ofruar këtë përvojë, për ne ka qenë dhe është më se e nevojshme dhe e domosdoshme. Mirëpo, fatkeqësisht deri tani, këtu më tepër kemi një drejtësi e cila më së paku ka të bëjë me drejtësi që ne e kemi parë në Perëndim dhe që duam ta ndërtojmë.

Zëri: Mos është më shumë marketing politik sesa zbatim i ligjit?

Limaj: Unë frikësohem se ne e kemi nxjerrë pikërisht këtë. Frikësohem se drejtësinë e kemi nxjerrë në një “stadium”, në media, në opinion dhe njerëzit i gjykojnë në publik. Gjykimi dhe kërkimi i drejtësisë është në organet e drejtësisë. Zbatimi i fakteve, dyshimeve dhe dilemave vërtetohen vetëm atje ku e bën bota e qytetëruar, në organet e drejtësisë - në gjykata.

Tendenca për t’i marrë faktet dhe drejtësinë për t’i nxjerrë jashtë në publik dhe publiku për të nxjerrë gjykime përfundimtare, kjo është. Ne e kemi përjetuar në të kaluarën. Ky është linçim publik dhe nuk ka të bëjë asgjë me drejtësinë. Në të kaluarën, në sistemin komunist kur ju keni dashur ta rrënoni një personalitet, ka mjaftuar një propagandë e linçimit publik dhe ka përfunduar në burg. Kjo ka ndodhur, ne dhe ju jemi dëshmitarë sepse jemi gjeneratë që kemi mund t’i shohim në të kaluarën.

Gjyqi po bëhet në opinion

Zëri: Kush po e bën këtë linçim, zoti Limaj, ndërkombëtarët apo vendorët?

Limaj: Jo, unë po them kjo është ajo që po dihet, unë nuk dua të them as vendorët, as ndërkombëtarët, por fatkeqësisht po ndodh në Kosovë. Po ndodh sepse janë përzier gjërat. Përsëri po them, tendenca për t’ua nxjerrë njerëzve faktet dhe njerëzit të gjykojnë nëpër kafene, nëpër gazeta ose televizione, dhe ta marrin si proces të drejtësisë, ta nxjerrin ta qesin atje, pa filluar një proces, pa pasur mundësi që gjykata të verifikojë fjalët e tua, faktet e mia dhe ajo të nxjerrë përfundime dhe pastaj të komentohet.

Nuk komentohet një vendim i gjykatës. Dhe ju paraprakisht të bëni gjyqin publik, kjo ka ndodhur vetëm në sistemet totalitare të cilat kanë pasur për qëllim linçimin e njerëzve, figurave, të cilët në njërën apo tjetrën, në një moment të caktuar, ka qenë në interesin e atij sistemi, atij mekanizmi për ta rrënuar ose linçuar dikë. Kjo nuk ka të bëjë asgjë me drejtësinë.

Zëri: Realisht ndaj jush nuk ka pasur një aktakuzë. E shihni këtë më shumë si një presion politik ndaj jush, si mungesë faktesh, apo cila është ajo arsye që nuk kemi aktakuzë?

Limaj: Së pari duhet të them se në një shtet normal hetimet janë më se normale. Çdo njeri që administron, ose ka një përgjegjësi, një detyrë publike, është më se normale që të jetë në syrin e vëzhgimit edhe të hetimeve dhe është gjëja më normale që ka ndodhur, ndodh dhe duhet të ndodhë në të ardhmen. Sistemi i parahetimeve i ka bazat e veta ligjore, të cilat ju e keni për obligim t’i respektoni.

Ju duhet t’i respektoni edhe sistemin ligjor, edhe njerëzit për të cilët bëhet fjalë, për të drejtat e tyre. Për atë edhe ne vlerësojmë dhe sot është demokracia, shteti i lirë, është fitues i sistemeve shtetërore për faktin se ke kujdes edhe në mbrojtjen e të drejtave të njeriut, por edhe njëkohësisht edhe në ruajtjen e interesave publike, duke respektuar ligjet.

Ajo që unë e di dhe e kam parë prej fillimi, është se hetimet janë më se normale, por unë e di se përfundimet do të jenë të pastra. Dhe pse duhet të ketë aktakuzë për diçka që nuk ka fakte.

Zëri: Pse s’po përfundojnë pra?

Limaj: Edhe kjo është një çështje që ju duhet t’i pyesni organet kompetente të EULEX-it, mendoj se ata duhet ta japin përgjigjeje. Unë e jap përgjigjen që më takon, atë që kam thënë qysh në ditën e parë, që në Ministrinë e Transporteve nuk ka pasur veprime për të cilat dyshohet dhe mendojmë se e kemi kryer detyrën ndershmërisht dhe ligjshmërish. I gjithë dokumentacioni që është do ta vërtetojë një gjë të tillë. Ne e kemi ofruar bashkëpunimin tonë me organet e drejtësisë për të ardhur deri te e vërteta. Neve na intereson e vërteta, mendoj se është në interes për publikun të dihet e vërteta.

Mendoj se dy koncepte janë gabuar. Hetimet vazhdojnë dhe nëse vijnë në përfundim. Përfundimet janë të dyanshme, sepse hetimet kanë gjithmonë dy përfundime, ose kanë përfundime në drejtim të aktakuzës, ose përfundimet që tregojnë se me gjithë hetimet çdo gjë është në rregull. Në të dy rastet fiton drejtësia. Në Kosovë nganjëherë nënkuptohet dhe fatkeqësisht dikush ka luajtur me këtë mungesë të edukatës sonë juridike, sepse drejtësi në Kosovë nënkuptohet vetëm kur njeriu hynë në burg.

Përkundrazi, e kundërta është, drejtësia është kur ju vini në përfundim, dhe është rezultat, kur ju shkoni e hetoni dhe nuk i gjeni ato për të cilat keni hetuar, edhe ky është rezultat, nuk është mungesë e rezultatit, është rënie e drejtësisë në vend, sepse, mesazhi është i qartë. Nuk lejohet politika të interferoj. Kemi pasur dyshime të caktuara, kemi hetuar dhe kemi ardhur në përfundim që nga këto dyshime nuk ka pasur asgjë të vërtetë dhe drejtësia ka shkuar në vend.

Mendoj se ky koncept duhet të kuptohet, pavarësisht nga përfundimi. Është një shpresë që drejtësia e vonuar është drejtësi e mohuar, por shpresoj që të aplikohet ajo drejtësia perëndimore. Do të doja shumë që në vendin tonë t’i kemi jo vetëm edhe njerëzit, por edhe standardet perëndimore. Do të doja shumë që standardet perëndimore të jenë në këtë vend.

Zëri: Për Ju realisht nuk ka pasur ndonjë aktakuzë për korrupsion. Ndërkohë EULEX-i tashmë ka ngritur aktakuza për korrupsion ndaj zyrtarëve publikë. Në rastin tuaj është kërkuar dorëheqja dhe largimi nga politika që të mos i pengosh hetimet. Nuk po shohim që ky standard është duke u zbatuar?

Limaj: Ju e dini që ka qenë e lansuar ajo ideja me duar të pastra, pa përfolje, që kanë qenë para fushatës. Mendoj që unë e kam bërë veprimin tim me vetë faktin që të jepet kjo mundësi, sepse duke qenë i bindur në atë që kam punuar, duke qenë i bindur në pastërtinë tonë. Megjithatë, kur ju jeni në hetime është një mjegull dyshimi.

Derisa të largohet ajo mjegull është gjë normale që ju të bëni këtë. Faktikisht, atëherë kam apeluar që ky standard, ose ky kriteri me duar të pastra të vlejë për të gjithë, jo të bëhet në mënyrë të selektuar. Koha po dëshmon se kjo ka qenë e orientuar në mënyrë selektive dhe nuk është respektuar nga të gjithë, fatkeqësisht.

Jam në dispozicion të drejtësisë

Zëri: Realisht ajo që më brengos dhe besoj se është brengosëse për demokracinë në Kosovë është fakti se ka një përshtypje të krijuar se edhe në rastin e veprimeve të ndërkombëtarëve, edhe në rastin e hetimeve të EULEX-it, hetimet në një formë të drejtësisë e cila është selektive dhe kjo flet edhe për rastin tuaj. Nga një akuzë për korrupsion keni kaluar në një akuzë tjetër, e cila ka të bëjë me çështjet që kinse kanë ndodhur gjatë luftës. Mos është duke u marrë shumë drejtësia selektivisht me zotin Limaj?

Limaj: Unë kam qenë në një pozitë të tillë, ju e dini që edhe Haga, ka ndodhur kjo për korrupsionin, kam qenë në një pozitë të tillë, fatkeqësisht, ose fatmirësisht, si të doni quani. Kështu ka dashur fati që të jem prej pasluftës vazhdimisht dhe si ka ardhur e tek ka ardhur, mendoj se do të rezervohem që të jap opinionin tim. Ajo që më takon mua të them, dhe që e kam thënë vazhdimisht është se pavarësisht nga mendimi im personal, unë e kam obligim t’i përgjigjem drejtësisë.

Unë e kam obligim të jem në dispozicion të organeve, nuk është me rëndësi a kam të drejtë, nuk është në dorën time të vlerësoj dhe të them se është e drejtë apo nuk është e drejtë, le të vlerësojë dikush tjetër. Organet e drejtësisë kur kërkojnë nga ju që t’i përgjigjeni, e keni obligim që t’i përgjigjeni, pastaj janë ato organe që vendosin se a kanë qenë apo nuk kanë qenë të drejta. Dhe unë jam i tillë, unë do të vazhdoj të jem në dispozicion të këtyre organeve pavarësisht kjo që ju thoni që ka ndodhur vazhdimisht në rastin tim dhe është krijuar përshtypja që EULEX-i është këtu vetëm për mua dhe jo për të tjerët, por unë do të jem në dispozicion jo për EULEX-in, por për hir të drejtësisë, për hir të shtetit, për hir të imazhit që duhet t’ia japim vendit tonë.

Jam i bindur se edhe nga padrejtësitë që bëhen ndaj meje fiton drejtësia në Kosovë. Jam i bindur se do të fitojë ky vend, nga kjo padrejtësi do të dalë diçka, do të dalë ai mesazh, do të dalë ajo që me gjithë përpjekjet për të bërë padrejtësi, kur ju qëndroni brenda drejtësisë, brenda kornizave ligjore, jam i gatshëm për të luftuar për të drejtën tuaj, e jep një mesazh të qartë për qytetarët që po jetojmë në një shoqëri të lirë dhe demokratike dhe nëse ka tendenca dikush për të dhunuar, do të gjejmë mekanizma, do të gjejmë rrugë që megjithatë drejtësia të fitojë, dhe jo të viktimizojë, ose të dhunojë në emër të drejtësisë me veprime të padrejta.

Kjo ka ndodhur në të kaluarën dhe lufta ime që sot po bëhet me arenën e drejtësisë është pikërisht kjo, se me shtetin e lirë që do ta ndërtojmë ne, me këto standarde, i fuqishmi nuk fiton gjithmonë, por fiton i drejti. I drejti fiton me mundime, por duhet të fitojë e drejta dhe i drejti. Duhet të fitojë i drejti që është në të drejtën e Zotit dhe të ligjit dhe jo gjithmonë i fuqishmi. Besoj se ky mesazh, ky veprim imi do t’i shërbejë edhe njeriut të rëndomtë, qytetarit të rëndomtë të Kosovës.

Kjo që ndodh me ne, imagjinoni se sa i pambrojtur është qytetari i Kosovës nëse ballafaqohet me diçka, ose është ballafaquar me diçka, e që ju dhe ne nuk kemi pasur rastin ta dimë historinë e tij, padrejtësitë që kanë ndodhur vazhdimisht.

Zëri: Zoti Limaj, ju në Hagë keni dalë i pafajshëm nga gjykimi i parë. Nga doli tash kjo dëshmia e re. Për të njëjtat akuza jeni hetuar, pse u rihap kjo çështje?

Limaj: Unë kërkoj nga ju mirëkuptimin që të mos komentoj këtë rast, për faktin se atje ka disa punë. Ne duhet të respektojmë organet e drejtësisë. Unë nuk do të bie në kurthin e atyre të cilët dëshirojnë që drejtësinë ta zhvendosin atje ku duhet bërë drejtësia, në medie dhe në opinionin publik, por duhet ta lënë në organet ku është, në gjykatë. Unë në çdo kohë dhe çdo moment do të jem i gatshëm që argumentet, të drejtën, të vërtetën time ta paraqes para organeve kompetente, por jo këtë ta kthejmë në një gjyq publik, në një gjykatë publike, duke nxjerrë argumente dhe kundër-argumente që dikush tenton ta nxjerrë në publik.

Tash ne jemi shtet demokratik dhe drejtësia do të jetë në organet e drejtësisë, dhe ju nuk mund të kërkoni të vërtetën përmes opinionit publik. Politika mund të bëhet me këtë percepcion, por drejtësia nuk bën t’i lihet percepcionit, drejtësia flet me fakte e jo me percepcion. Unë do të jem i gatshëm që në çdo kohë të jap argumentet e t’i çoj në gjykatë. Shpreh keqardhje shumë për dhjetëra e dhjetëra njerëz të cilët kohëve të fundit janë shqetësuar pa të drejtë.

Unë do të jem i gatshëm që t’i dërgoj argumentet e mia në organet e drejtësisë. Do të doja që edhe të tjerët të veprojnë në këtë mënyrë dhe drejtësia të ndahet atje ku ndahet, në gjykata. Drejtësia nuk ndahet as në gazetën tuaj, as në politikë. Përndryshe, nëse bëjmë kështu, tendenca për të marrë dhe ndriçuar në duart tuaja dhe ju të bëheni arbitër i drejtësisë në publik është linçim, linçim publik, kështu ka ndodhur në të kaluarën.

(Vijon në numrin e nesërm)