(E plotësuar) Shtetet e radhës që do ta njohin Kosovën shumë shpejt do të jenë surprizë e mirë edhe për kundërshtarët edhe për skeptikët e ndryshëm, thotë Behxhet Pacolli, zëvendëskryeministër i parë i Kosovës, gjatë një interviste për “Zëri”.

Pas njohjes nga Gaboni dhe Nigeria, Kosovën do ta njohin shpejt, Bregu i Fildishtë, Togo, Gana, Mali, vendet e SADAK-ut, e shumë vende tjera të Afrikës, bën të ditur Pacolli.

Për vetëm tri turnetë e tij të fundit thotë se ka vizituar 70 për qind të vendeve afrikane. Gjatë rrugës së tij nuk mohon vështirësitë dhe mundin që ka pasur, së pari duke u munduar që shumë prej presidentëve të këtyre vendeve t’i takojë përmes miqve të tij nëpër botë.

Prandaj, ai nuk e mohon faktin, se sikur të ishte president i Kosovës, do ta kishte pasur shumë më lehtë. Serbisë i thotë që e ka “kot”, me përpjekjet e saj për të ndalur njohjet ndaj Kosovës. Kurse mohon që ndërmjet tij dhe ministrit të Jashtëm të Kosovës, Enver Hoxhaj, ka pasur apo ka përplasje për lobimet e tij.

Ndër tjera ai e jep edhe një porosi për të gjithë udhëheqësit e bizneseve kosovare, për të cilat ka menduar gjatë turneut në Afrikë.

“Unë personalisht do t’i mbështes të gjithë biznesmenët e interesuar që të krijojnë bashkëpunim me shtetin e Nigerisë, për mundësitë ekonomike që edhe në Kosovë të hapen vende të reja të punës”.

Zëri: Z. Pacolli, keni paralajmëruar tash e sa ditë njohjen nga Nigeria, mirëpo ende nuk e kemi notën verbale të njohjes nga ky shtet. Çka ndodhi në realitet?

Pacolli: Pas një debati shumë të gjatë në Abuja, kryeqytetin e Nigerisë, vend ky me mbi 160 milionë banorë, qeveria e këtij shteti ka njoftuar se do të iniciojë etablimin e relacioneve ndërshtetërore me Republikën e Kosovës. Ministri i Punëve të Jashtme i Nigerisë, Olugbenga Ashiru më njoftoi mua se njohja e Kosovës është evidente.

Ditën e nesërme pas intervencave të mëdha të fqinjit tonë të veriut, pra Serbisë, dikush nga Ministria e Punëve të Jashtme kishte pasur një konference për medie, ku kishte thënë se Nigeria ende nuk do të vazhdon t’i etablojë marrëdhëniet me Kosovën.

Por, para pak ditësh, qeveria në Abuja e rikonfirmoi këtë duke cekuar, se dëshiron të ketë relacione të mira me këtë Republikë të re në Evropë.

Unë me ekipin tim qëndrova rishtas për një vizitë treditore në këtë shtet. Unë garantoj se Nigeria ka filluar procesin për njohjen formale të Republikës së Kosovës, edhe pse është në presion jashtëzakonisht të madh nga fqinji ynë i veriut. Ministri i Punëve të Jashtme, z.Ashiru, në një konferencë për medie kishte përgënjeshtruar informatën gjoja se Nigeria ka bërë U-turn në relacion me Republikën e Kosovës. Në konferencën për shtyp të pardjeshme, MPJ rikonfirmon fillimin e marrëdhënieve me Kosovën dhe hap dyert për krijimin e një përfaqësie bilaterale në Prishtinë dhe Abuja...

Sa i përket Nigerisë, më duhet gjithsesi të shtoj se ne do ta kontaktojmë Odën Ekonomike të Kosovës, me qëllim që të formojmë një listë me firmat kosovare që dëshirojnë të jenë prezente në tregun nigerian, ku ka mundësi shumë të mëdha për përfitime. Unë personalisht do t’i mbështes që të marrin kontaktet e duhura dhe të krijojmë mundësi ekonomike nga ky bashkëpunim që edhe në Kosovë të hapen vende të reja të punës, pasi që atje ekzistojnë mundësi reale për ata që kanë ide profesioniste dhe vullnet për punë.

Deklaroj po ashtu haptazi se në vizitën time të ardhshme në Nigeri, unë do të marr me vete biznesmenë nga Kosova, që i kanë kompanitë e veta dhe që dëshirojnë te zhvillojnë bashkëpubnim ekonomik me këtë vend.

Zëri: Po çfarë mund të na thoni për notën verbale të Gabonit?

Pacolli: Më duhet po ashtu të shtoj se për sa u përket kritikave se disa thonë që ka qenë paralajmërim, por mungon nota verbale, duhet t’u them atyre që skepticizmi i tyre është i paarsyeshëm dhe ata i kanë të gjitha mundësitë që ta vërtetojne këtë para se të thonë të kundërtën. Jo rrallë kjo edhe e dëmton procesin me skepticizmin e tyre pasi që komunikimi sot është i digjitalizuar, dhe çdo gjë e vogël që vjen nga Kosova mund të ndikojë negativisht në zhvillimin e marrëdhënieve bilaterale mes Kosovës dhe atij shteti.

Nota verbale është një formalitet, me të cilin informohet një shtet se institucionet e një vendi marrin vendim për njohje të sovranitetit të një shteti. Kjo notë verbale nuk mund të pasojë kurrë pa qenë vendimi i qeverisë. Në shume shtete vendimi i qeverise kalon nëpër disa instanca, nga shefi i shtetit, këshilli i ministrave, komisioni parlamentar për marrëdhënie me jashtë. Nëse një vendim i këtyre institucioneve është pozitiv atëherë i kthehet qeverisë dhe qeveria e merr konkluzionin për njohjen e shtetit te të gjitha përfaqësitë diplomatike që i ka në botë.

Pra, akti final i njohjes nuk është nota verbale që vjen, por është vendimi i një shteti për njohje. Në Gabon ka ndodhur kjo dhe shihet në faqet e fletës zyrtare të këtij shteti se njohja ka ndodhur dhe këtu ekziston plotëfuqia e njohjes. Unë personalisht e kam informuar me plot përgjegjësi opinioni publik në Kosovë, që në momentin që është marrë vendimi se Gaboni e ka njohur Republikën e Kosovës dhe e rikonfirmoj me plot përgjegjësi se kjo ka ndodhur. Edhe formaliteti i notës verbale do të pasojë pas kthimit nga Nju-Jorku.

Omani dhe njohja nga ky shtet është përfolur po ashtu. Unë ju garantoj se pas një komunikimi që kam pasur me ta, dhe pas spekulimeve nga Beogradi, se ky shtet është në listën e miqve të Kosovës dhe mbështetësve të fuqishmëm të kauzës së Kosovës dhe se në Beograd është folur vetëm për mungesën e përfaqësuesve diplomatikë mes këtyre dy shteteve.

Mirëpo, ne kemi shumë shtete që na kanë njohur por nuk kanë përfaqësi diplomatike te ne. Është e paqëlluar dhe destruktive që nga skeptiket të ridiskutohet kjo, sepse përpos që e përkrah Kosovën si shtet, shteti i Omanit, fuqishëm e mbështet çdo iniciativë të Kosovës për integrime në qarqet globale.

Zëri: Tash e sa kohë po bëni një lobim shumë aktiv në vendet afrikane. Çfarë rezultatesh prisni nga ky lobim?

Pacolli: Unë besoj se t’i vizitosh mbi 70 për qind të vendeve afrikane dhe të takosh 70 për qind të presidentëve afrikanë në tri turnet e mia është punë e madhe, sepse nuk njihet ndokush që ndonjëherë ka bërë një gjë të tillë.

Përpos, rezultateve të vizitës së fundit në Afrikë, janë Gaboni, Nigeria, takimi me presidentin Zuma të Republikës së Afrikës së Jugut, takimi me presidentin e Tanzanisë, këto të fundit e kryesojnë organizatën SADEK që mbledh shumë shtete afrikane, dhe premtimi se shumë shpejt do të kemi shumë njohje nga kjo pjesë e botës dhe garancitë që më janë dhënë janë rezultatet e fundit të vizitës sime.

Shumë shpejt do të kemi njohje edhe nga Bregu i Fildishtë (edhe pse atje vështirësitë ekzistojnë më shumë të karakterit intern), Togo, Gana. Mali është punë e kryer dhe mungon vetëm procedimi i njohjes. Për planet e ardhshme pas takimeve që do të kem në Nju-Jork, unë prapë do të kthehem në Afrikë dhe do të implementoj vizitën time në Kamerun, Uganda, Keni, Çad dhe në Sudan.

Me këtë turne unë besoj se duhet të pritet dhe formimi i qeverive të reja në Egjipt dhe Tunizi dhe ne Libi, ku sigurisht se do të ketë nevojë për vizita por ato janë shumë afër dhe do të kryhen në momente të caktuara.

Zëri: Gjatë këtij aktiviteti lobues, cilat janë pengesat më të mëdha që i hasni?

Pacolli: Vështirësitë më të mëdha janë kuptohet se duhet takuar ata që kanë mundësi të marrin vendime për njohje siç janë presidentët e vendit. Po të përcillej protokolli i çdo shteti, në diplomaci duhet të takohet homologu, pra unë si zëvendëskryeministër do të duhet ta takoja zëvendëskryeministrin e atij shteti. Dhe pyetja që normalisht duhet të shtohet është: A ju merr mendja se zëvendëskryeministri i një shteti mund të vendosë për ta njohur pavarësinë e një shteti tjetër? Jo, është përgjigja që gjithkush duhet ta dijë.

Vendimet në shumicën e këtyre vendeve i marrin shefat më të lartë që janë presidentët. Që unë të ulem me burrështetas e të bisedoj për njohjen e shtetit tonë, unë po i shfrytëzoj miqtë e mi që i kam në mbarë botën, që të aranzhohen takimet me presidentë dhe kur t’i takoj edhe i bindi që ta njohin shtetin tonë – Kosovën. Nuk dua ta fsheh aspak se sikurse të isha në pozitën e presidentit të vendit gjithçka do të ishte më lehtë.

Një tjetër vështirësi është se Kosova nuk paraqet ndonjë interes për këto shtete, dhe është shumë vështirë që shtetet e largëta që nuk kanë ndonjë interes në Kosovë, ta njohin Kosovën. Aty duhet shkuar për të lobuar duke filluar ekskluzivisht nga qarqet më të larta të këtyre shteteve, pasi që rekomandimi duhet të vijë ekskluzivisht nga lart. Kjo është edhe arsyeja pse unë kontaktoj ekskluzivisht presidentë të shteteve, e numri i tyre që kam takuar dhe nga të cilat kanë pasuar njohjet, janë të mëdha.

Si para hyrjes sime në qeveri po ashtu edhe pas hyrjes sime ne qeveri, mjafton vetëm që të shikohen publikimet gjegjësisht notat verbale në MPJ të Republikës së Kosovës. Nuk është aspak punë e lehtë, por vullneti dhe dëshira ime e zjarrtë që ta shoh vendlindjen tonë më të fortë e më të zhvilluar si dhe të integruar në strukturat euroatlantike më jep kurajë e forcë që të vazhdoj ta bëj të pamundurën për qytetarët tanë që e meritojnë të kenë një jetë më të mirë.

Zëri: A po ka fuqi diplomacia serbe që të pengojë fushatën tuaj lobuese për njohjen e Kosovës?

Pacolli: Po, kanë fuqi, sepse ata edhe i kanë trashëguar kontaktet dhe ambasadat e ish-Jugosllavisë. Fqinji ynë i veriut po më kundërshton mua dhe Kosovën rregullisht. Por, rezultatet e takimeve të mia për të mirën e Kosovës, po tregojnë edhe më shumë rezultate, pra e them që fqinji ynë i veriut e ka të kotë, sepse Kosova është shtet, po njihet nga shumë shtete e do të njihet edhe nga shumë të tjera.

Zëri: Para kohe sikur ka pasur njëfarë përplasje ndërmjet jush dhe ministrit të Jashtëm për marrjen e meritave të njohjeve. A ka përplasje të tilla ndërmjet jush dhe z. Hoxhaj?

Pacolli: Jo, ju garantoj se jo. Ne kemi kontakte të rregullta dhe të sinqerta me njëri-tjetrin.

Zëri: A po keni përkrahjen e duhur në punën e juaj nga ana e Qeverisë së Kosovës, dhe veçanërisht nga kryeministri Thaçi?

Pacolli: Ne kemi bashkëpunim të plotë në Qeverinë e Kosovës. Para çdo vizite jashtë unë e informoj qeverinë e po ashtu edhe pas kthimit nga jashtë unë i raportoj qeverisë për takimet e mia.

Zëri: Çka prisni nga vizita e juaj në Nju-Jork, gjatë punimeve të Asamblesë së Përgjithshme të OKB-së?

Pacolli: Unë në Nju-Jork do të kem takime të shumta me shumë presidentë të vendeve të ndryshme, të cilat i kam vizituar përpara e edhe do t’i vizitoj. Padyshim presim qartësime për njohje të reja të shtetit tonë që po forcohet dita-ditës, Republikës së Kosovës.