Ekonomia e Kosovës ende është fragjile. Kështu thonë ekspertët kosovarë të ekonomisë, duke u mbështetur edhe në konkluzionet e Raportit të Progresit të këtij viti për Kosovën, ku potencohet edhe ndërhyrja institucionale në ekonomi.

Ndërsa Radica Nusdorfer nga Zyra Ndërlidhëse e Komisionit Evropian në Prishtinë, sqaron se gjatë vlerësimit të përputhshmërisë me kriteret ekonomike për anëtarësim, Bashkimi Evropian fokusohet në dy aspekte kryesore - ekzistencën e një ekonomie funksionale të tregut dhe kapacitetin për ta përballuar presionin konkurrues dhe forcat e tregut brenda BE-së.

Sipas saj, sa i përket kriterit të parë, mund të thuhet në përgjithësi se Kosova është e orientuar në ndjekjen e këtyre politikave ekonomike, por sipas Raportit të Progresit të Komisionit Evropian për vitin 2011, zbatimi i këtyre politikave mbetet sfidë.

Sipas Raportit të Progresit të këtij viti për Kosovën, sfidat kryesore mbeten edhe deficiti i lartë tregtar, sidomos në tregtinë e mallrave, investimet e huaja direkte të kufizuara, papunësia e lartë, sfidat në planifikimin fiskal dhe në cilësinë e financave publike, shkalla e lartë e ekonomisë informate etj.

Megjithatë, sipas saj, BE-ja do të vazhdojë të mbetet e angazhuar për t’i mbështetur autoritetet vendore në këtë fushë, përmes një numri të projekteve financuara nëpërmjet Instrumentit të Para Anëtarësimit(IPA).

Nusdorfer pohon se pengesë për Kosovën në fushën e ekonomisë së tregut është edhe mosfurnizimi i rregullt me energji elektrike dhe sundimi i dobët i rendit dhe ligjit.

Lumir Abdixhiku, drejtor ekzekutiv i Institutit “Riinvest”, thotë se nëse merret për bazë Raporti i Progresit për Kosovën, vendi ka një ekonomi fragjile, e cila mbështetet në ndërhyrje institucionale.

“Këto ndërhyrje institucionale e bëjnë çrregullimin e tregut”, shprehet Abdixhiku, duke shtuar se Qeveria e Kosovës duhet t’i ndërpresë interferencat e veta nëpërmjet prokurimit publik. Sipas tij, ekonomia informale e cila është e pranishme në vend po ashtu shkakton pabarazi në treg.

Edhe Safet Gërxhaliu, kryetar i Odës Ekonomike të Kosovës, thotë se funksionomi i ekonomisë së tregut brenda kufijve administrativë, lufta kundër korrupsionit, shkalla e lartë e ekonomisë informale, respektimi i pronës intelektuale, mbesin sfidë për Kosovën, ndërkaq vendi po ngec në këto fusha.

“Vetë fakti që ka dukuri negative në ekonomi, atëherë nuk mund të themi se funksionon ekonomia e tregut në Kosovë”, potencon Gërxhaliu.