Niveli i kënaqshmërisë me punën e gjykatave të Kosovës, ka rënë për 7 për qind që nga qershori i këtij viti. Kështu thuhet në hulumtimin e fundit të Programit të Kombeve të Bashkuara për Zhvillim Ekonomik (UNDP), i cili bazohet në anketat e qytetarëve.

Sipas UNDP-së, vetëm 19 për qind e qytetarëve të anketuar kanë treguar kënaqshmëri me punën e gjykatave. Qytetarët kanë pritje shumë më të mëdha nga gjykatat dhe prokuroritë në luftimin e fenomeneve negative në shoqëri.

Edhe raporti i fundit i Progresit për Kosovën i Komisionit Evropian ka konstatuar se ka ende shumë punë për të bërë për ta implementuar tërësisht pushtetin e ligjit në Kosovë. Në kuadër të përkrahjes së gjithmbarshme për avancimin e sistemit të drejtësisë, BE-ja ka lansuar para disa ditësh projektin për fuqizimin e Këshillit Gjyqësor të Kosovës (KGJK) dhe Këshillit Prokurorial të Kosovës (KPK).

Khaldoun Sinno nga Zyra Ndërlidhëse e Komisionit Evropian në Kosovë, thotë se KGJK dhe KPK e luajnë rolin kryesor në profesionalizimin si dhe ngritjen e efikasitetit dhe pavarësisë së gjykatave dhe prokurorive në Kosovë.

“T’i kesh këshillat efikas gjyqësorë nga këndi i strukturës të tyre organizative, kuadrove profesionale dhe promovimit të tyre të mirëfilltë, do të thotë të punosh në fuqizimin e sundimit të ligjit”, thotë Sinno.

Sipas tij, këto këshilla gjenden përpara një detyre shumë të rëndësishme, sepse pavarësia e gjyqësorit është e rëndësisë thelbësore për vendin. Sinno thotë se sundimi i ligjit, jo vetëm që është në funksion të demokracisë, por e ndihmon edhe perspektivën evropiane të Kosovës.

Kryetari i Këshillit Gjyqësor të Kosovës, Enver Peci, vlerëson se mbështetja e Bashkimit Evropian për gjyqësorin paraqet një hap shumë të rëndësishëm drejt promovimit të vlerave të efikasitetit, transparencës dhe llogaridhënies në mesin e gjykatësve dhe prokurorëve.

“Gjyqësori ka nevojë edhe më tutje të përmirësohet në punën e tij. Shpresoj se me hapat e filluar në procesin e emërimit dhe riemërimit të gjyqtarëve dhe prokurorëve të vazhdohet, që gjyqësori dhe sundimi i ligjit të arrijnë pavarësinë e standardeve evropiane”, ka thënë Peci.

Kryeprokurori i shtetit, Ismet Kabashi, vlerëson se projekti i ri i BE-së për vazhdimin e reformave në sistemin gjyqësor të Kosovës, vjen në kohën e duhur për sistemin prokurorial të Kosovës, i cili, sipas tij, po kalon nëpër një reformë të thellë. Përvoja dhe ndihma e KE-së do të ndihmojë sistemin prokurorial të Kosovës, që në vend të zbatohen praktikat më të mira evropiane.