Në vendin që ka probleme të mëdha sa i përket furnizimit të rregullt të konsumatorëve me energji elektrike, Bashkimi Evropian(BE) ka ndarë miliona euro deri më tani edhe në projekte të ndryshme për kursim të energjisë. Një prej sfidave kryesore të Kosovës është ulja e konsumit të energjisë për 9% deri në vitin 2018.

Është përgatitur Plani i veprimit kombëtar për efiçiencë të energjisë, i cili do të udhëheqë punën në drejtim të rritjes së kursimit. Ky plan, ndër të tjera, parasheh veprime të menjëhershme në sektorin e ndërtimtarisë, për përmirësimin e projektimeve dhe performancës, pasi që ndërtesat përbëjnë 40% të kërkesës totale për energji.

Lendita Gashi nga Zyra Ndërlidhëse e Komisionit Evropian në Prishtinë ka bërë të ditur se në bazë të Instrumentit të Paraanëtarësimit(IPA) 2009 për efiçiencë të energjisë në vend janë planifikuar edhe 17.5 milionë euro, prej tyre 16.5 milionë euro për implementim të masave të efiçiencës në ndërtesat publike dhe 1 milionë euro të tjera për të përkrahur Ministrinë e Zhvillimit Ekonomik (MZHE) dhe komunat e Kosovës në promovim të efiçiencës dhe burimeve të ripërtëritshme.

Në anën tjetër, zyrtarët e MZHE-së thonë se disa projekte i kanë përfunduar deri më tani për kursim të energjisë në bashkëpunim me Komisionin Evropian. Vitin e kaluar institucionet vendore dhe ndërkombëtare nënshkruan një marrëveshje për financimin e një projekti madhor për kryeqytetin dhe për Kosovën.

Më këto marrëveshje realizohet mbështetje financiare në shumë prej 24.8 milionë euro, prej të cilave 13.8 milionë euro janë grant nga Bashkimi Evropian, 6 milionë euro grant nga qeveria gjermane si dhe € 5 milionë kredi nga Banka Gjermane për Zhvillim, KfW.

Ministri i Financave, Bedri Hamza, e kishte vlerësuar lart këtë projekt, duke thënë se ka për objektiv ofrimin e ngrohjes cilësore për banorët e kryeqytetit përmes investimeve kapitale në ndërmarrjen komunale të ngrohjes, Termokos.

Përfitimet pas përfundimit të projektit, sipas Hamzës, do të jenë të shumanshme: Shpenzimet operative të “Termokosit” do të ulen për rreth 50%, me kalimin në sistemin e ngrohjes me avull, “Termokosi” nuk do të varet nga ndryshimet e çmimit të mazutit në treg, si dhe do të ketë ulje të konsumit të energjisë elektrike për ngrohje dhe si rrjedhojë përmirësim të furnizimit me energji.