Përkrahja e Bashkimit Evropian (BE) për modernizimin e arsimit të lartë në Kosovë, përmes projektit Tempus, synon që në kuadër të sistemit të edukimit universitar të implementojë standarde moderne evropiane. Programi i BE-së “Tempus” është projekti më i njohur evropian për bashkëpunim universitar ndërkombëtar mes vendeve anëtare të BE-së dhe atyre që synojnë t’i bashkohen kësaj të fundit.

Falë “Tempusit” sistemi i arsimit të lartë në Kosovë ka nisur procesin e harmonizimit të planprogrameve me universitetet evropiane dhe ngritjen e cilësisë së mësimdhënies. Në konkursin e vitit të kaluar të “Tempusit”, 5 projekte të universiteteve kosovare kanë fituar grante në vlerë prej 2 milionë eurosh.

Shefja e zyrës nacionale të Tempusit, Kimete Canaj, ka thënë se kohë më parë është hapur konkursi i pestë me radhë i “Tempusit” për universitetet kosovare, ku mund të konkurrojnë për fonde në vlerë prej 2.5 milionë eurosh në vitin 2012.

Ajo vlerëson se programi i Tempusit është një histori suksesi. “Programi i Tempusit përmes projekteve kontribuon në transmetimin e vlerave, risisë, inovacionit dhe barazisë. Vlerat të cilat janë esenciale për zhvillimin e një shoqërie demokratike, moderne dhe qytetare”, ka thënë ajo.

Përmes programit të “Tempusit”, sipas saj, janë arritur mjaft ndryshime në modernizimin dhe harmonizimin e arsimit të lartë me atë të bashkësisë evropiane. Progami i “Tempusit” synon sjelljen e eksperiencës dhe praktikave më të mira universitare nga vendet anëtare të BE-së në Kosovë.

Filip Rufio, ekspert evropian, i cili është i angazhuar për implementimin e këtij programi në Kosovë, thotë se “Tempusi” e inkurajon krijimin e konkurrencës së shëndoshë mes universiteteve kosovare. “Disa nga universitetet kosovare do të duhet të ballafaqohen me konkurrencën në rritje, për shkak të numrit të madh të universiteteve”, ka thënë ai.

Asistenca evropiane për modernizimin e sistemit të arsimit konsiderohet si jashtëzakonisht e rëndësishme. Christof Stock nga Zyra Ndërlidhëse e Komisionit Evropian në Prishtinë, thotë se “Tempusi” jo vetëm që sjell në Kosovë standarde moderne për mësimdhënie universitare, por edhe krijon hapësirë për bashkëpunim dhe partneritet mes universitete kosovare dhe evropiane.

“Komisioni Evropian është duke i inkurajuar të gjitha universitetet dhe fakultetet që të aplikojnë në tenderin e 5 në kuadër të programit të Tempusit”, ka pohuar Stock.

Ministri i Arsimit Ramë Buja thotë se programi i “Tempusit” e përbën një rast unik për ngritjen e standardeve të përgjithshme në mësimin universitar, por edhe për inkuadrimin e këtij sistemi në rrjedhat moderne universitare në Evropë.