E fundit nga të gjitha vendet e rajonit, Kosova e ka nisur dialogun për liberalizimin e vizave me Bashkimin Evropian (BE). Nisjen e këtij dialogu e ka shënuar javën e kaluar vizita në Prishtinë e komisionares për Punë të Brendshme e Komisionit Evropian, Cecilia Malmstrom. Qëllimi i këtij dialogu është që të hiqet obligimi për pajisjen me viza për qytetarët e Kosovës.

Sidoqoftë, kjo do të jetë e mundshme vetëm pasi që Qeveria e Kosovës të ketë zbatuar reforma të rëndësishme në fushat kryesore, siç janë: Siguria e dokumenteve të udhëtimit, menaxhimi i kufijve, migrimit dhe azilit, rendi publik dhe çështjet e sigurisë (sidomos luftimi i krimit të organizuar dhe korrupsioni), si dhe çështjet e të drejtave themelore që lidhen me lirinë e lëvizjes.

"Përkushtimi ynë për liberalizimin e vizave për qytetarët e Kosovës është i vërtetë dhe jam shumë e kënaqur që tani mund të fillojmë me përparim konkret drejt këtij qëllimi. E di sa i rëndësishëm është udhëtimi pa viza për të gjithë qytetarët e Kosovës dhe jam e kënaqur që e kemi nisur këtë proces. Megjithatë, nëse dhe sa shpejt qytetarët e Kosovës do të kenë privilegjin e udhëtimit pa viza, varet plotësisht nga përpjekjet e vazhdueshme të Qeverisë së Kosovës për zbatimin e reformave në fushën e sundimit të ligjit dhe përparimin konkret në terren", ka theksuar Malmström.

Megjithatë, rrugëtimi kosovar drejt futjes në Listën e Bardhë të Shengenit praktikisht mund të nisë vetëm në fund të pranverës, nëse deri atëherë Komisioni Evropian arrin të finalizojë “udhërrëfyesin” për këtë dialog. Malmstrom ka konfirmuar që “lista e detyrave” për Kosovën në këtë dialog as që është draftuar deri tash.

“Unë shpresoj që udhërrëfyesi të jetë gati gjatë kësaj pranvere”, ka potencuar ajo.

Edhe pas hartimit të kësaj “liste detyrash”, ajo nuk do t’i dërgohet menjëherë Kosovës, pasi fillimisht ajo duhet aprovuar nga shumica e vendeve anëtare.

Ndërsa kryeministri i Kosovës, Hashim Thaçi, nisjen e dialogut me BE-në e ka vlerësuar si një kapitull i ri për Kosovën, siç ka thënë ai, kapitull historik, ai i evropianizimit të Kosovës.

Ai është zotuar se institucionet e vendit do të jenë të përkushtuara plotësisht për zbatimin e të gjitha kritereve.

”Ne premtojmë se të gjitha kriteret e nevojshme teknike për liberalizimin e vizave, do t’i përmbushim në një afat rekord”, ka thënë Thaçi.

Edhe raportuesja në Parlamentin Evropian, Tanja Fajon, ka mirëpritur vendimin e Komisionit Evropian për nisjen e dialogut për viza me Kosovën.

Sipas saj, është lajm i mrekullueshëm për qytetarët e Kosovës, të cilët janë të vetmit që kanë mbetur prapa murit të vizave në Ballkanin Perëndimor .

“Njerëzit meritojnë këtë privilegj të udhëtimit pa viza në momentin kur qeveria t’i ketë përmbushur të gjitha kriteret e nevojshme. Tani është momenti për ta kapur këtë mundësi”, ka thënë Fajon.