Hapësira ku parkoheshin kamionët e lagjes është shndërruar në një fushë moderne sportive për nxënësit e shkollës fillore “Emin Duraku” në Kaçanik.

Projekti ku u investuan 82 mijë euro nga Komisioni Evropian, jo vetëm që do të shfrytëzohet për zhvillimin e aktiviteteve sportive për për 1600 nxënës të shkollës, të cilën mundësi nuk e kanë pasur deri më tani, mirëpo ka mundësuar edhe hapjen e disa vendeve të reja të punës.

Daut Shehu, mësimdhënës në këtë shkollë, pohon se me investimet e BE-së është krijuar një ambient shumë i favorshëm për zhvillimin e aktiviteteve sportive për nxënësit.

“E mira tjetër e këtij investimi është se oborri i shkollës në të cilin mbaheshin orët e edukatës fizike, tani është liruar tërësisht dhe është krijuar hapësirë më e madhe për lëvizje të lirë të nxënësve dhe personelit arsimorë”, potencon Shehu.

Rinovimi i oborrit të Shkollës “Emin Duraku” është njëri nga shumë investimet e bëra në kuadër të projektit të Komisionit Evropian (KE) “Kosova e Bukur” për të cilin janë ndarë mbi 5 milionë euro. Në Komunën e Kaçanikut është bërë edhe gjelbërimi dhe ndërtimi i një shtegu (në gjatësi 685 metra) për këmbësorë në njërën anë të lumit Nerodime. Ky projekt ka kushtuar rreth 61 mijë euro, ku Komuna ka participuar me 3500 euro.

Implementimi i këtij projekti ka gjeneruar 30 vende pune, duke i përfshirë 20 veta të regjistruar në Qendrën e Punësimit të Ministrisë së Punës për të cilët punësimi do të jetë më fatgjatë. Nga 20 të punësuar, 2 janë persona me aftësi të kufizuar.

Bajram Reka, punëkërkues në Zyrën Komunale të Punësimit që nga viti 2001, thotë se ka punuar dy muaj në këto projekte, nga të cilat ka siguruar të ardhura për familjen.

“Ia kam pa hairin kësaj pune, sidomos për këtë dimër, sepse s’kemi të ardhura të tjera”, potencon ai.

Kreu i Komunës së Kaçanikut, Xhabir Zharku, thotë se Komunat ballafaqohet me mungesë të mjeteve të nevojshme financiare përkundër kërkesave të shumëta për buxhet, prandaj, janë të mirëseardhura këto investime nga donatorët ndërkombëtar për qytetarët.

Sipas tij, këto projekte kanë gjeneruar edhe vende pune, prandaj, siç thotë ai, ka diskutuar me donatorët për vazhdimin e projekteve të tilla në Komunën e Kaçanikut.

Përndryshe, synimi i përgjithshëm i këtyre projekteve është që të kontribuojë në zbutjen e varfërisë nëpërmjet mundësive ekonomike për popullsinë e Kosovës, sidomos për grupet e margjinalizuara dhe krijimit të kushteve për të nxitur zhvillimin ekonomik, social dhe kulturor.

Tekstit i kontriboi edhe korrespondenti i “Zërit” nga Kaçaniku, Kjani Sallahu.