Serbia do të duhet të përballet dhe ta pranojë realitetin e pavarësisë së Kosovës, si pjesë e përpjekjeve për tu anëtarësuar në Bashkimin Evropian, tha të enjten ministri i jashtëm gjerman, Guido Westerwelle në Beograd, raporton agjencia e lajmeve "Reuters".

"Pajtimi mund të jetë i suksesshëm vetëm nëse përballeni me realitetin – pavarësia e Kosovës është realitet”, tha Guido Westerwelle në Beograd gjatë turneut të tij ballkanik. "Harta e Evropës juglindore është hartuar dhe kompletuar”.

"Ata që dëshirojnë të bëhen pjesë e Evropës duhet të kenë politika të balancuara”, tha Westerwelle duke iu referuar Kosovës. "Na duhet dialog rreth çështjeve praktike. Do të vijë dita kur përfaqësuesit e BE-së, Kosovës e Serbisë do të jenë të ulur në të njëjtën tavolinë. Tani për tani, mund të duket si utopi”.

Serbia bojkoton në mënyrë tipike ngjarjet ndërkombëtare nëse zyrtarët e Kosovës janë prezent.

Westerwelle tha se “pas mendimit të GJND-së do të duhej që të gjitha diskutimet të merrnin fund. Rezultati i dhënë nga GJND-ja është i qartë”, tha ai. “Brukseli është vendi për zgjidhjen e problemeve, e jo Nju Jorku”.

Të premten, Westerwelle planifikon të udhëtojë për në Kosovë.