Anëtari serb i Presidencës së Bosnje e Hercegovinës, Nebojsha Radmanoviq ka thënë të martën se do ta informojë Asamblenë e Përgjithshme të OKB-së se BeH nuk ka qëndrim sa i përket rezolutës serbe për Kosovën.

"Nëse kryetari i Presidencës së BeH, Haris Silajxhiq dhe ambasadori i Bosnjës në OKB, Ivan Barbaliq votojnë kundër rezolutës që e ka dorëzuar Beogradi në lidhje me Kosovën, ky nuk është qëndrimi i Bosnjës”, ka thënë Radmanoviq para gazetarëve në Banjallukë, raporton agjencia serbe e lajmeve “Tanjug”.

Ai ka shtuar se askush nuk ka të drejtë të votojë kundër rezolutës së Serbisë, pasi që për këtë nuk është marrë vendim nga presidenca e BeH, që është i vetmi organ kompetent për të marrë vendime rreth deklaratave në AP të OKB-së.