Sarajevë. Presidenti turk, Abdullah Gyl, deklaroi nga Sarajeva se përpjekja e Turqisë për krijimin e klimës së besimit dhe stabilitetit në Ballkan nuk duhet konceptuar si ndërhyrje në punët e brendshme të ndonjë vendi.

Gjatë një fjalimi në kryeqytetin boshnjak, Gyl tha se "thelbi i politikës sonë është vendosja e paqes, sigurisë dhe stabilitetit dhe në një periudhë shumë të shkurtër kemi realizuar me sukses një sërë iniciativash pozitive, të gjitha me synimin për paqe, stabilitet dhe siguri në terma afatgjata në rajon'.

Presidenti turk, i cili kryesonte një delegacion të madh biznesmenësh, u prit në aeroport nga Kryetari i Këshillit Presidencial të Bosnjë-Hercegovinës, Haris Silajxhiç. Pas takimit me homologun e tij, Gyl iu drejtua me një fjalim deputetëve të parlamentit boshnjak, ku theksoi se Ankaraja i kushton vëmendje të njëjtë të gjitha komuniteteve etnike dhe fetare në Bosnje.