Londër. Skandali godet sërish konservatorët e David Cameroon, pasi një gazetë britanike publikon fakte që sipas saj tregojnë se gruaja e një deputeti konservator punon si prostitutë. Është e përditshmja “Sunday Mirror”, e cila raporton se bashkëshortja e deputetit Mike Weatherley ofron trupin e saj për 70 sterlina.

Bëhet fjalë për 39-vjeçaren braziliane, e quajtur Carla, e martuar me një prej deputetëve më të rinj që Cameroon paraqiti pak kohë më parë. Sipas gazetës, dy herë i martuar, Weatherley u takua me Carlan 10 vjet më parë gjatë një udhëtimi biznesi në një festë në Rio De Zhanero, ku sipas disa burimeve të pakonfirmuara ajo që atëherë shiste veten për seks. Ata nisën një marrëdhënie dhe babai i 3 fëmijëve vendosi t’i blejë Carlas një apartament në zonën ekskluzive të plazhit Kopa Kabana.

Ata u martuan më 2003 dhe sipas certifikatës së martesës, ajo cilësohet si shtëpiake.

Fillimisht Carla e la të kaluarën pas, por nuk mundi me sa duket të harrojë profesionin e saj të vjetër. Një reporter investigativ i “Sunday Mirror”, arriti t’i bëjë disa fotografi në një prej shtëpive publike në jug të Londrës, ku Carla ofron edhe shërbimet e saj. Duke mos ditur se bëhej fjalë për një gazetar, por për një klient të thjeshtë, gruaja e Weatherleyt u prezantua si Bea dhe i dha listën e çmimeve për shërbimet e saj, duke i rrëfyer klientit se punonte gjithashtu edhe në 2 shtëpi të tjera publike.

“Më pëlqejnë njerëzit këtu. Janë klientë të mirë, veç kësaj ky është një vend i mirë ku mund të fitosh para”, tha Carla, ndërsa i shoqi, deputeti Weatherley ka thënë para gazetarëve se ishte shokuar nga lajmi se bashkëshortja e tij punonte si prostitutë, por sipas tij, çifti është ndarë që në muajin shkurt dhe se takohen vetëm një herë në javë për drekë, si dy miq të mirë.