Shkup. Policia e Maqedonisë dhe ajo e Kosovës thonë se janë në kontakt të vazhdueshëm prej të dielës, që kur në Prishtinë u arrestua Lirim Jakupi-Nacisti, i cili akuzohet për disa vepra penale në Kosovë dhe Maqedoni. Ende nuk dihet se i arrestuari Lirim Jakupi, i cili posedon nënshtetësi kosovare, do të ekstradohet apo jo në Maqedoni, raporton agjencia e lajmeve INA

Nga Ministria e Punëve të Brendshme të Maqedonisë sqarojnë se në Maqedoni akoma është aktivë urdhër-arrsti për Jakupin.

MPB e Maqedonisë thotë se, “edhe pse Prishtina dhe Shkupi nuk kanë nënshkruar marrëveshje për ekstradim, në bazë të disa konventave ndërkombëtare, ekziston mundësia ai t’i dorëzohet autoriteteve maqedonase”.

Policia e Kosovës dje ka arrestuar Lirim Jakupin, i arratisur tre vjet më parë nga burgu i Dubravës. Arrestimi i tij është bërë jo larg qendrës së Prishtinës, në rrugën “Bajram Bahtiri”.

Në një komunikatë të policisë thuhet se aksioni është ndërmarrë nga departamenti kundër Krimit të Organizuar i PK-së, i përkrahur edhe nga Njësiti Special Intervenues.

“Gjatë kontrollit të realizuar, policia ka gjetur dhe ka konfiskuar dy granata dore, një armë automatike AK-47, me katër karikatorë, si dhe dy revole të tipit TT".

Me urdhër të prokurorit, të dyshuarit i është caktuar masa e ndalimit policor për 48 orë, deri në vazhdimin e procedurave të tjera gjyqësore. Lirim Jakupi është në mesin e shtatë personave, të cilët kishin arritur të arratiseshin nga burgu i Dubravës më 18 gusht të vitit 2007. Lirim Jakupi, lindur më 1979 nga Gjilani, akuzohet për veprën penale të rrëmbimit. (INA)