Teksti i lëndës së muzikës për klasat e shtata në Maqedoni regjistron një tjetër skandal për fëmijët e klasave fillore. Në këtë tekst nuk flitet për asnjë këngë apo autor shqiptar, çka detyroi arsimtarët e shkollave fillore në Gostivar të bojkotojnë librin dhe të dërgojnë një ankesë në Ministrinë e Arsimit.

“Ky libër në këtë rast ka katër autorë, të gjithë maqedonas, nuk është asnjë shqiptar. Brendia e librit nuk ka asnjë të vetme këngë me element të folklorit apo që ka të bëjë me diçka shqiptare. Aty janë këngë folklorike maqedonase, këngë fetare ortodokse, që është më keq me foto fetare. Ne prej sot kemi vendosur që mos ta përdorim këtë libër dhe apelojmë tek ministria e arsimit që ta tërheqë menjëherë atë”, deklaron për televizionin “Alsat-M”, Xhevair Jashari, mësues i muzikës.

“Unë kam 32 vjet përvojë asnjëherë nuk kam hasur të tillë libër. Ka pasur lëshime edhe tek librat e tjerë, por ky është 100 për qind për nxënësit maqedonas. Unë si arsimtare nuk do e pranoj këtë libër”, shtoi Fikrie Emruli, mësuese muzike.

Mësuesit e muzikës, në bojkotin e tyre kanë edhe përkrahjen e Komunës së Gostivarit, e cila thotë se nuk është e mundur që nxënësit shqiptarë të mësojnë këngë folklorike maqedonase apo këngë dhe lutje krishtere.

“Është një diskriminim ndaj shqiptarëve. Nxënësit shqiptarë janë të detyruar të këndojnë këngë maqedonase të përkthyera në shqip. Ne i mbështesim arsimtarët dhe do tentojmë që libri në fjalë të tërhiqet nga përdorimi dhe të sillet libër që plotëson standardet”, deklaroi Shpend Kaprolli, përgjegjës i sektorit të arsimit në Komunën e Gostivarit.

Arsimtarët kërkojnë nga ministri i Arsimit që të tërheqë menjëherë librin dhe ai të kompensohet me libër adekuat, në të kundërtën ata do të bojkotojnë lëndën e muzikës në klasat e shtata. (Start & Alsat-M)