Presidenti i Serbisë Boris Tadiq, është takuar pak kohë më parë në Bruksel me shefen e diplomacisë së Bashkimit Evropian, Catherine Ashton, në saje të konsultimeve me BE-në rreth rezolutës për Kosovën, raporton portali serb, “Smedia”.

Tadiq dhe Eshton do të kenë një darkë pune, mirëpo ky takim mund të jetë edhe mundësi që, pas shumë kontakteve diplomatike të kohëve të fundit të nivelit të ngjashëm, të gjendet një zgjidhje kompromisi e cila nuk do të kalonte “vijën e kuqe” të Beogradit (njohjen e pavarësisë së Kosovës), por e cila do t’i kënaqte edhe fuqitë e mëdha.

Jozyrtarisht, thuhet se shtetet që e kanë njohur pavarësinë e Kosovës kanë kundërshtuar tekstin e rezolutës të cilën Serbia e ka dërguar në AP të OKB-së, seanca për të cilën mbahet më 9 shtator.

Tadiq më herët ka shprehur gatishmërinë e Serbisë për të bashkëpunuar me BE-në në gjetjen e kompromisit, por ka deklaruar se nuk do të pranojë asnjë dokument i cili do të shkonte në dëm të interesave nacionale të Serbisë.

Mirëpo, të martën gjatë ditës, sipas burimeve nga BE-ja të cituara nga medie të ndryshme, është deklaruar se është arritur konsensus në mes të shteteve anëtare të BE-së sa i përket rezolutës së Serbisë për Kosovën, ku thuhet se “qëndrimi zyrtar evropian nuk dallon shumë nga ai i shprehur me datën 22 korrik, kur Catherine Ashton, në emër të 27-shes evropiane, bëri ftesë për nisjen e dialogut në mes të Prishtinës e Beogradit, ku do të shtjelloheshin çështjet që janë në interes të të dy vendeve e të cilat mund të përmirësojnë jetën e njerëzve në Kosovë dhe Serbi”.

“Qëndrimi ynë është fuqishëm i inspiruar nga deklarata e 22 korrikut. Nuk ka dallime thelbësore”, ka deklaruar një zyrtar evropian.

Ndërkohë, mediat serbe raportuan të martën se është arritur një marrëveshje midis Beogradit dhe Brukselit për mendimin e rezolutës serbe në AP të OKB-së.