Presidenti i shtetit, Gjorgje Ivanov do t’u japë dekorata hendbollistëve të Maqedonisë për dy arsye kryesore, e para sepse fyen shqiptarët me parulla naziste dhe e dyta arritën rezultat në hendboll, shkruan “Lajm”.

Partia shqiptare në pushtet, Bashkimi Demokratik për Integrim (BDI) ia lë në dorë presidentit të vlerësojë për meritat e tyre, ndërsa partitë shqiptare të opozitës kërkojnë dënimin e tyre dhe reagimin e partisë shqiptare.

“Bashkimi Demokratik për Integrim ka dënuar thirrjet shoviniste të tifozëve në kampionatin evropian të hendbollit në Nish ku për fat të keq u përfshinë edhe lojtarët e reprezentacionit. I mbetet kryetarit të shtetit të vlerësojë se sa është etike të njëjtët të vlerësohen me dekorata”, tha zëdhënësi i BDI-së, Bujar Osmani.

Ndërkaq, Partia Demokratike Shqiptare (PDSH) vlerëson se këta sportistë jo vetëm që nuk duhet të shpërblehen, por të dënohen për ofendimet e thëna dhe për nxitje të urrejtjes.

“Derisa bota e civilizuar investon miliona euro që nëpërmjet sportit të promovojë kulturë e respekt ndaj të tjerëve, vetëm Maqedonia investon në sport për të kundërtën. Qëndrimi i PDSH-së është se këta sportistë jo vetëm që nuk duhet të shpërblehen, port ë kërkohet përgjegjësi dhe të dënohen për ofendimet e thëna dhe për nxitje të urrejtjes”, tha zëdhënës i PDSH-së Agon Ferati.

PDSH pret që BDI si participiente në qeveri kësaj radhe të jetë e vetëdijshme në veprimet e saja dhe jo të veprojë si herëve të tjera kur i përshëndeste sportistët dhe ju bashkëngjitej në festë.

“Nëse nuk e bën këtë atëherë le të tregojë publikisht interesat e kujt i përfaqëson, të shqiptarëve ose jo”, tha ai.

Mendim të ngjashëm ka edhe Rilindja Demokratike Kombëtare (RDK). “Vetë fakti i pritjes së hendbollistëve nga kryeministri dhe presidenti tregoi se edhe ata pajtohen me të gjitha fyerjet që iu bënë shqiptarëve gjatë kampionatit të hendbollit. Ne gjithnjë e kemi kritikuar ashpër ato fyerje të cilave iu bashkëngjitën edhe vetë hendbollistët si dhe heshtjen e partnerit shqiptar në qeveri. Fyerjet e nisura nga tifozët e hendbollit dhe vetë hendbollistët u përhapën edhe më tej dhe të krijohet një përshtypje e zymtë se shqiptarët kurë nuk kanë qenë në pozita më poshtëruese sesa tani dhe e gjithë kjo falë politikës së BDI-së”, tha zëdhënësi i RDK-së, Armir Ramadani.

Gjatë kampionatit të hendbollit, tifozët dhe lojtarët, hodhën parulla fashiste kundër shqiptarëve dhe në vend që të dënohen ata u shpërblyen nga shteti.