Kryeministri grek, Lukas Papadimos ndodhet sot në Bruksel, ku do të marrë pjesë në samitin e lartë të Bashkimit Evropian, në fokus të të cilit është situata ekonomike në vendet e eurozonës, raporton agjencia e lajmeve NOA.

Greqia është një ndër vendet më të prekura nga kriza e borxheve, por kjo nuk ka ulur shqetësimin e Bashkimit Evropian lidhur me performancën e administratës greke dhe menaxhimin, që qeveria e Papadimos po i bën krizës në fjalë.

Brukseli ka bërë të qartë se kriza greke nuk do të kapërcehet nëse autoritetet nuk do të shtrëngojnë rripin, ç’ka nënkupton jo vetëm reduktimin e pagave dhe pensioneve, por edhe kufizimin e pagës së 13-të dhe 14-të, që përfitojnë buxhetorët.

Në Bruksel do të diskutohet po ashtu edhe mundësia e mbikëqyrjes së shpenzimeve publike të Greqisë nga një strukturë e veçantë e Bashkimit Evropian.

Propozimi u bë pak ditë më parë nga kancelarja gjermane Angela Merkel, por hasi në reagimin e ashpër të autoriteteve greke.

Kjo për shkak të presionit të madh mbi qeverinë greke, e cila nuk ka fituar ende besimin e qytetarëve.

Samiti i lartë i BE-së do të diskutojë miratimin e mekanizmit mbështetës për vendet e eurozonës, i cili do të kontrollojë shpenzimet e tepruara si dhe do të vërë frerë mbi thellimin e borxhit publik në këto vende.

Në lupën e Brukselit do të kalojnë po ashtu edhe buxhetet e vendeve anëtare, të cilat duhet të sanksionojnë në kushtetutë kufirin e borxhit.

Vetëm shtetet që do të nënshkruajnë marrëveshjen për krijimin e një mekanizmi të shpëtimit, do të përfitojnë mbështetje financiare nga Bashkimi Evropian. /noa/