Gjykata Supreme në Rumani ka dënuar me 2 vjet burg ish-kryeministrin Adrian Nastase, i cili akuzohej për korrupsion. Nastase, që ka udhëhequr qeverinë e social-demokratëve në mes të vitit 2000 dhe 2004 është akuzuar se për të financuar fushatën elektorale të 2004-ës ka marrë nga buxheti i shtetit 1.7 milionë euro.

Ish kryeministri, i cili nuk ishte i pranishëm në gjykatë kur u dha vendimi, i ka thënë televizionit Realitatea se do ta apelojë vendimin.

“Ky vendim është qartazi rezultat i presionit që u bë mbi gjykatësit”, ka thënë Nastase.

Ai ka thënë se nga provat që ka ofruar në gjykatë është parë se ai është i pafajshëm dhe se rasti i tij është i “motivuar politikisht”.

Ai po përballet me një proces të tretë gjyqësor në lidhje me një marrëveshje për shtëpinë e tij luksoze, e cila thuhet se u ndërtua në këmbim të emërimit të kreut të firmës ndërtuese si ministër, ndërsa një muaj më parë u shpall i pafajshëm për një rast tjetër korrupsioni.

Procesi gjyqësor ndaj tij është monitoruar nga afër nga ana e Bashkimit Evropian.