Kryetari i Partisë Socialiste Edi Rama deklaroi se opozita do të votojë të enjten në seancë plenare pro kërkesës së Prokurorisë për heqjen e imunitetit të tre deputetëve socialistë Tom Doshi, Besnik Bare dhe Taulant Balla, të cilët dyshohen për organizim tubimesh të paligjshme, raporton agjencia e lajmeve NOA.

Shefi i opozitës gjatë mbledhjes së grupit kuvendor socialist theksoi se opozita mbështet hetimin dhe zbardhjen e plotë të ngjarjeve dhe vrasjeve të 21 janarit duke nënvizuar se vënia në dispozicion të plotë të hetimit të Prokurorisë e deputetëve socialistë e nderon Partinë Socialiste.

“Të enjten ne do të votojmë në mbështetje të kërkesës së Prokurorisë për heqjen e imunitetit të deputetëve socialistë Tom Doshi, Besnik Bare, Taulant Balla. Vënia e tyre në dispozicion të plotë të hetimit të ngjarjeve të 21 janarit e nderon PS-në”, tha Rama.

Kryesocialisti nënvizoi gjatë deklaratës se opozita e mbështet hetimin e Prokurorisë mbi 21 janarin dhe Prokuroren e Përgjithshme Ina Rama, të cilën sikundër tha Edi Rama, opozita e njeh si Kryeprokuroren e vendit.

Sipas Kryetarit të PS-së hetimi për ngjarjet e 21 janarit ka prova gozhduese, të cilat janë përforcuar nga ekspertiza amerikane e FBI-së. /noa/