Kuvendi ka votuar heqjen e imunitetit për tre deputetët socialistë, Taulant Balla, Tom Doshi dhe Besnik Bare. Tashmë ata mund të hetohen lirisht nga Prokuroria. Heqja e imunitetit të deputetëve u votua përkatësisht me 118 vota pro për Taulant Ballën, 116 për Tom Doshin, dhe 107 për Besnik Baren.

Të tre deputetët morën fjalën e radhës në seancë, për të folur mbi kërkesën e prokurorisë, ndërkohë që janë shprehur të gatshëm për lënien e imunitetit.

Edhe miratimi i kalendarit 3-javor do të votohet sot në seancë. Një ditë më parë konferenca e kryetarëve ka miratuar me unanimit kalendarin e punimeve të Kuvendit për 3 javët që vijnë. Sipas tij, kodi civil dhe penal, që qëndrojnë në sirtarët e Kuvendit që nga 2007-ta, do nisin të shqyrtohen në komisione prej datës 16 shkurt, për tu miratuar në datë 23 të po të këtij muaji.

Ndërsa sipas kalendarit aktual, kodi civil ishte parashikuar për tu votuar sot, po për shkak të mos përfundimit të shqyrtimit të tij në komisione, ai është parashikuar në kalendarin e ardhshëm. /as/