Drejtori Përgjithshëm i Zgjerimit në Komisionin Europian, Stefano Sannino nisi vizitën zyrtare në Tiranë, duke zhvilluar fillimisht një takim me shefin e diplomacisë shqiptare, Edmond Haxhinasto.

Në takimin e zhvilluar në Ministrinë e Jashtme ishte i pranishëm edhe ambasadori i Bashkimit Evropian Ettore Sequi.

“Procesi i integrimit evropian eshte nje proces gjithëperfshires, në të duhet të jenë pjesë të gjithë partitë, sepse vetëm kështu cohet përpara axhenda e integrimit”, tha Sannino per mediat, pas takimit.

Kjo është vizita e dytë që Sannino zhvillon në Tiranë pas asaj të 19 Tetorit 2011, ku pasi ka takuar zyrtarët më të lartë qeveritar dhe kreun e opozitës la një mori detyrash për çuarjen përpara të agjendës evropiane.

Burime diplomatike i thanë Top Channel se vizita e Sanninos është e lidhur me shqetësimin e Brukselit për hapat e ngadaltë në përmbushjen e 12 prioriteteve nga të cilat është përmbushur vetëm një që ishte emërimi Avokatit të Popullit.

Dy janë çështjet, pohojnë të njëjtat burime, se ku do të përqendrohet biseda e Sanninos me kryeministrin Berisha dhe liderin e opozitës, Edi Rama: Reforma Zgjedhore që ka nisur dhe ngadalësia me të cilën po ecën ky komision përfshi atë të reformës parlamentare, ku ende palët nuk kanë një dakordësi për ndryshimet e kërkuara.

Gjithashtu në agjendën e Sanninos do të jetë diskutimi çështjes së luftës kundër korrupsionit pas vendimit të gjykatës për çështjen “Meta” për të cilën Brukseli është shprehur se është mbajtur shënim dhe vlerësimi do të jepet në progres raportin e ardhshëm.

Hartuesit e vizitës së Drejtorit të Përgjithshëm të Integrimit në Komisionin Evropian, jo pa qëllim kanë përfshirë në agjendë edhe ndjekjen e seancës së radhës nga Sannino të mbledhjes së Komisionit të Integrimit. /tch/