Republika Islamike e Iranit ka bërë disa ndryshime të mëdha në Kodin e saj Penal për të ndaluar vrasjet me gurë dhe ekzekutimet e të miturve. Sipas raportimeve në mediet lokale iraniane, reformat janë aprovuar nga Këshilli Kujdestar, një organizëm i ngarkuar me detyrë për të siguruar se ligjet e vendit nuk bien ndesh me rregullat islamike.

Legjislacioni tani kërkon vetëm nënshkrimin e Presidentit të vendit për të hyrë në fuqi. Irani aktualisht mban rekordin e zi për ekzekutimin e më shumë të miturve se cilido vend tjetër në botë. Një raport i publikuar nga organizata për mbrojtjen e të drejtave të njeriut, “Human Rights Watch”, më parë këtë vit, pat zbuluar se më shumë se njëqind fëmijë në Iran janë në listë për t’u ekzekutuar. Shumica e tyre nuk vriten para se të mbushin 18 vjet.

Vrasja me gurë zakonisht është e rezervuar për meshkujt dhe femrat që shpallen fajtorë për tradhti bashkëshortore. Të paktën 99 njerëz janë vrarë me gurë në Iran nga viti 1980.

Drewery Dyke, ekspert për Iranin në organizatën “Amnesty International”, paralajmëron se për shkak të zbrazëtive në sistemin ligjor iranian, reformat s’janë aq të qarta sa duken.

“Ekzekutimi është koncept specifik ligjor në Iran. Ndëshkimi për vrasje në Iran sipas të drejtës islamike quhet ‘ndëshkim i shpirtit’”, shpjegon Dyke, duke shtuar se fëmijët ende mund të ekzekutohen nëse akuzohen për vrasje.

“Ata e kanë hequr edhe ndëshkimin me vrasje me gurë për tradhti, por ende nuk dimë se ç’ndëshkim do të parashihet në ligjin e ri. Ka ca gjëra që s’vërehen lehtë, reformat lejojnë aplikim të fshehtë të vrasjes me gurë”.

Dënimet me ekzekutim atje zakonisht shqiptohen për krime si vrasja, homoseksualizmi, tradhtia bashkëshortore, kontrabanda e drogës, spiunazhi dhe komplotet kundër shtetit.

“Amnesty International” ka paralajmëruar në dhjetor për një “seri vrasjesh të përmasave tmerruese” që po kryhen në Iran, duke raportuar se më shumë se 600 njerëz janë vrarë nga shteti nga fillimi i vitit 2011 deri në fund të muajit nëntor. Të paktën tre ishin fëmijë.

Në shtator, Ban Ki-moon, sekretar i përgjithshëm i Kombeve të Bashkuara, ka shprehur shqetësimin e tij të madh për shkeljen e të drejtave të njeriut nga Republika Islamike. Ai ishte shprehur “tejet i brengosur nga raportimet për rritje të ekzekutimeve, amputimeve, arrestimeve dhe burgosjeve arbitrare, gjykimeve të padrejta, torturës dhe keqtrajtimit”.

Lajmet se 45-vjeçarja Sakineh Mohammadi Ashtiani ishte dënuar me vrasje me gurë pas shpalljes fajtore për vrasje dhe tradhti bashkëshortore patën shkaktuar një valë të madhe të polemikave në mbarë botën. Si rezultat i trysnisë ndërkombëtare, ndëshkimi i saj është “pezulluar” në janarin e vitit të kaluar. Tani, Ashtianin e pret vdekja nga varja në një litar.

Irani edhe në të kaluarën është munduar që të përmirësojë qasjen ndaj të drejtave të njeriut. Dhjetë vjet më parë, gjyqësorit të Iranit i ishte kërkuar që të shmangte dënimet me vrasje me gurë dhe të shqiptonte dënime me varje në litar. (The Daily Telegraph)