Sot mbushen plot 21 vjet nga rrëzimi i shtatores së ish-diktatorit komunist, Enver Hoxha, i cili qeverisi me dorë të hekurt Shqipërinë komuniste, që prej vitit 1945. Pamjet e atyre ngjarjeve, të shkurtit të vitit 1991 në sheshin “Skënderbej”, bënë xhiron e botës dhe e vunë edhe një herë Shqipërinë në fokus të zhvillimeve ndërkombëtare.

Pas 45 vitesh diktaturë proletariati, vendi i fundit komunist i Evropës Juglindore po njësohej me parimet demokratike të perëndimit. Thirrjet “Ta bëjmë Shqipërinë si gjithë Evropa”, u bënë simbol i protestave studentore dhe qytetarëve të Tiranës, shkruan “Noa”.

Megjithatë, regjimi komunist kishte lëshuar rrënjë të thella në ndërgjegjen e shqiptarëve, ndaj dhe ithtarët e diktatorit dhe Partisë së Punës nuk u pajtuan lehtë me sistemin e ri që po instalohej në vend.

Tubime pro komunizmit u mbajtën në shumë qytete të vendit, në shenjë solidariteti me partinë dhe porositë e shokut Enver, por gjithçka degradoi shpejt për shkak të rrokopujës ekonomike, që vendi kishte marrë që prej viteve ‘80.

Në Shqipëri u instalua sistemi pluralist që shumë shpejt nisi rrugën e vështirë të instalimit të demokracisë sipas modeleve perëndimore. Megjithatë, përvoja e munguar bëri që Shqipëria të kalojë në një fazë tjetër, atë të tranzicionit, që për fatin tonë të keq po vijon ende.

Ngjarjet e ndodhura gjatë këtyre 21 viteve e konsoliduan demokracinë në Shqipëri, por sërish mbetet shumë rrugë për të konkretizuar thënien e 21 viteve më parë “Ta bëjmë Shqipërinë si gjithë Evropa”.

Edhe pse kanë kaluar dy dekada, Shqipëria vazhdon të mos përmbushë aspiratat e atij viti që shënoi “kthimin” e pllakës së historisë, duke lënë pas afro gjysmë shekulli izolim, shkruan “Shekulli”.

Data 20 shkurt është për një prej ngjarjeve më të shënuara të historisë moderne të Shqipërisë. Më 18-20 shkurtit 1991, 700 studentë u futën në një grevë urie. Përmes asaj greve, të mbështetur nga mijëra qytetarë të Tiranës dhe mbarë Shqipërisë, ata kërkonin që Universitetit të Tiranës t’i hiqnin emrin e diktatorit Enver Hoxha. Më 20 shkurt 1991 qindra qytetarë rrëzuan bustin e diktatorit.

Sot, në ambientet e Muzeut Historik Kombëtar do të përurohet Pavijoni i Terrorit Komunist ku do të marrë pjesë edhe kryeministri i vendit Sali Berisha, raporton “BalkanWeb”. Në këtë pavijon, nëpërmjet fotove, dokumenteve, shifrave e objekteve personale të të burgosurve, të pushkatuarve e të internuarve të shumtë, do të jepen të dhëna tronditëse të kësaj kategorie njerëzish - nga njerëzit e thjeshtë deri tek ish deputetë e ministra.