Schlesinger: S’ka edhe BE-në edhe Kosovën

Eksperti amerikan për Ballkanin, Martin Schlesinger ka vlerësuar se "ka vend” për negociata të reja për Kosovën, por vlerësoi se Serbia nuk mundet t’i arrijë të dyja prioritetet e saja – edhe të bëhet anëtare e BE-së edhe ta mbajë Kosovën në përbërjen e saj, raporton "Blic".

"Sigurisht se ka vend për negociata të reja. Problemi është se ka dallime të mëdha në qëndrimet rreth temës së atyre negociatave. Mendoj se BE-ja dhe përfaqësuesit e Kosovës shpresojnë se këto negociata kryesisht do të jenë rreth çështjeve teknike, në fushën e marrëdhënieve të mira në mes të pakicës serbe dhe shumicës shqiptare. Natyrisht se për serbët, çështja kryesore është statusi dhe marrëdhënia e serbëve ndaj Kosovës. Në këtë kuptim, unë shpresoj se janë të mundshme të dy llojet e bisedimeve”, citohet të ketë thënë Schlesinger, kontribuues në Qendrën “Woodrow Wilson” në Uashington, sipas të përditshmes beogradase "Blic".

I pyetur nga gazeta se a ka mundësi që Serbia t’i arrijë të dyja, edhe të bëhet anëtare e BE-së edhe ta mbajë Kosovë, Schlesinger u përgjigj thjeshtë: "Jo".

"Nuk besoj që Serbia, fizikisht mundet ta mbajë Kosovën si pjesë të sajën. Ajo është e ndarë fizikisht nga Serbia për më shumë se dhjetë vjet”, tha ai.

Sa i përket politikës së jashtme serbe për Kosovën në dy vjetët e fundit, eksperti amerikan thotë se ndjehet “i zhgënjyer dhe i frustruar”, pasi që është marrë me statusin e Kosovës “sikurse një gjë e tillë të ishte ende një çështje e hapur, rezultati i së cilës mund të ndryshohej".

"Mundësitë për kthimin e sovranitetit serb dhe kontrollit ndaj Kosovës janë të pamundshme, së paku nga viti 1998, qysh para bombardimit të NATO-së, e sidomos pas shpalljes së pavarësisë”, është shprehur eksperti amerikan, Martin Schlesinger.