Teheran. Kryetari iranian Mahmud Ahmadinexhad ka filluar një iniciativë të re për shtimin e popullatës duke refuzuar planin familjar të cilin Irani e kishte marrë nga Perëndimi kundër vullnetit te Zotit dhe e kishte zbatuar me dekada.

Hapi i ri i Qeverisë parasheh pagesën me të holla familjeve për çdo fëmijë të lindur dhe deponime mujore në llogari të sapolindurit deri sa të mbushë 18 vjet.

Plani është pjesë e përcaktimit të Qeverisë që të rrisë numrin e banorëve të Iranit i cili sot ka 75 milionë banorë. Ahmadinexhad dikur kishte thënë se vendi mund të mbajë deri në 150 milionë banorë.

Program do të jetë tërheqës sidomos për shtresat me të ardhura të ulëta të cilat ishin kurrizi i përkrahjes së Ahmadinexhadit në zgjedhjet e vitit 2005 dhe 2009. Vlerësohet se rreth 10 milionë iranianë jeton nën kufirin e varfërisë.

Në fillim të viteve 1970 Irani kishte filluar fushatën e suksesshme të planifikimit të familjes me mesazhin “dy fëmijë mjaftojnë”. Fushata u ndalua pas Revolucionit islamik të vitit 1979 por u ripërtëri dhjetë vjet më vonë kur popullata u shtua shumë e ekonomia ngeci.

Sipas planit të ri, çdo fëmijë iranian i lindur në vitin e ardhshëm, që fillon më 21 mars, do të ketë depozitën nga 950 dollarë në llogarinë bankare.

Veç kësaj ata do të marrin nga 95 dollarë çdo vit deri sa t’i mbushin 18 vjet. Nga prindërit prite të paguajnë po këtë shumë.

Fëmijët mund t’i tërheqin paratë kur t’i mbushin 20 vjet dhe t’i shpenzojnë për arsimim, martesë, shëndetësi dhe banesë.

Shkalla e papunësisë në Iran është 10 për qind. (Reuters)