Preshevë. Kryetari i Partisë për Veprim Demokratik në Luginën e Preshevës, Riza Halimi, ka akuzuar partinë rivale- PDSH-në se ka anashkaluar lidershipin në Luginë të Preshevës në zhvillimin e negociatave me përfaqësuesit e Qeverisë së Kosovës, ndërsa ka akuzuar edhe ministrin kosovar të Arsimit, Enver Hoxhaj për monopol.

Reagimi i Halimit ka ardhur pas vizitës së kryetarit të Komunës së Preshevës, Ragmi Mustafa në Prishtinë, i cili gjatë një takimi me përfaqësuesit e Qeverisë së Kosovës arriti një marrëveshje për rritjen e kuotës së të rinjve shqiptarë të Luginës së Preshevës për të studiuar në Universitetin e Prishtinës.

Megjithatë, kjo çështje është konsideruar si monopol nga ana e Halimit, për shkak të mospjesëmarrjes së tij në këto takime. Lideri i PVD-së ka kërkuar nga përfaqësuesit e Kosovës që ky veprim të mos përsëritet, pasi që, sipas tij, po injorohet kryetari i komunës së Bujanocit, nënkryetari i Medvegjës dhe kryetarët e kuvendeve komunale të Preshevës dhe Bujanocit.

PVD edhe më tej vazhdon që Këshillin Nacional ta konsiderojë si organ që i përfaqëson shqiptarët e Luginës së Preshevës, edhe përkundër faktit se këtë organ e përbën për momentin vetëm një subjekt politik-PVD. M.Ahmeti