Programi i Qeverisë 2008 – 2011, por edhe programi për zhvillim ekonomik i hartuar nga ministrat e dikasterit të ekonomisë në Bullgari, si të tillë kanë mbetur në letër. Që të dyjave programe u ka skaduar afati i implementimit, dhe asnjëri nga to, thuajse nuk ka arritur të zbatohet fare në praktikë.

Sipas planit 2008 – 2011, thuhet se Qeveria e Kosovës do të punojë në krijimin e një ambienti të përshtatshëm për tërheqjen e investimeve të huaja direkte (IDH). Në mënyrë që të jetë konkurruese me vendet e regjionit, Kosova duhet t’i nënshtrohet të ashtuquajturit “proces i përshtatjes”, ku synohet që produktet vendore të bëhen më të lira sesa ato të regjionit, me qëllim të stimulimit të eksportit dhe zëvendësim të importit.

Por, diçka e tillë nuk ndodhi në realitet. Investimet e huaja direkte në vendin tonë pësuan rënie të jashtëzakonshme. Kosova edhe më tej po e humb atraktivitetin për investitorë të huaj për shkak të raporteve negative të hartuara për vendin tonë, nga shumë organizata të fuqishme ndërkombëtare.

Po ashtu, asnjë progres në Kosovë nuk është arritur gjatë kësaj periudhe kohore edhe sa i përket promovimit të prodhimeve vendore. Deficiti tregtar i vendit vazhdon të rritet dita ditës, ku ka ngufatur prodhuesit e paktë vendorë që kanë mbetur deri më tash.

“Në veçanti, do të investohet në sektorin e energjisë, në mënyrë që të ketë furnizim të pandërprerë me energji dhe në infrastrukturën tjetër fizike, posaçërisht atë rrugore dhe hekurudhore, që do të mundësonin lidhjen e Kosovës me vendet fqinje”, thuhet ndër tjera në raportin e skaduar të Qeverisë 2008 – 2011.

Plani i Qeverisë po ashtu një rëndësi të veçantë i ka kushtuar edhe sektorit të energjisë në vend. Por, dhe në këtë sektor ndryshimet nuk vërehen fare.

Sipas planit, Qeveria ka paraparë që gjatë periudhës 2008 -2011, sigurim të besueshmërisë së kapaciteteve gjeneruese të energjisë elektrike me synim furnizimin e qëndrueshëm me energji elektrike, vazhdimin e reformimit dhe ristrukturimit për ta bërë sektorin energjetik të qëndrueshëm financiarisht dhe atraktiv për investime, si dhe modernizimin e rrjetit të bartjes dhe shpërndarjes, duke siguruar integrimin e tyre në rrjetin rajonal dhe evropian të energjisë deri në vitin 2011.

Por, asnjëri qëllim nuk është realizuar në kohen të cilën e ka paraparë Qeveria e Kosovës përmes planit të saj 2008-2011. Po ashtu, edhe plani i ministrave të dikasterit ekonomik i hartuar në Bullgari gjatë vitit 2010 ka dështuar në tërësi.

Sipas atij plani, shpallja e fituesit për shitjen e PTK-së, është dashur të ndodhë në tetor të vitit që lamë pas. Ndërkaq, përmbyllja financiare në dhjetor të vitit 2011. Po ashtu edhe shpallja e fituesit për privatizimin e distribucionit është dashur të ndodhë në fund të muajit shtator të 2011-ës, ndërkaq përmbyllja financiare në dhjetor të vitit që lamë pas.

I dështuar ka dalë parashikimi i Qeverisë, edhe rreth ndërtimit të termocentralit të ri “Kosova e Re”

Sipas planit të hartuar në Bullgari, publikimi final i kërkesës për propozime është dashur të ndodhë qysh në gusht të vitit 2011. Ndërkaq, shpallja e fituesit në mars të këtij viti.

Qeveria nuk flet

Në anën tjetër zyrtarë të Qeverisë së Kosovës nuk kanë dashur të flasin rreth dy programeve që janë hartuar, por që asnjëherë nuk janë zbatuar në praktikë.

Gazeta u ka dërguar pyetje Gëzim Baxhakut, këshilltar i ministrit të Zhvillimit Ekonomik, por ky nuk është përgjigjur në pyetjet e gazetës, duke u arsyetuar se është jashtë Prishtinës dhe nuk ka mundur të kthejë përgjigje në pyetjet që gazeta “Zëri” ia ka dërguar atij.