Prishtinë. Zëdhënësi i Qeverisë së Kosovës, Memli Krasniqi, siç raporton e përditshmja serbe “Blic”, ka hedhur poshtë si të papranueshme propozimin e Serbisë që doganat e Kosovës të emërtohen “EULEX Doganat e Kosovës”.

"Kosova është shtet i pavarur dhe sovran dhe Doganat e Kosovës janë institucion që ka dalë nga Kushtetuta dhe ligjet e Kosovës dhe funksionon si e tillë”, është shprehur para gazetarëve Krasniqi.

Sipas fjalëve të tij, Kosova nuk do të pranojë dhe as nuk do të bëj asnjë lloj kompromisi apo lëshim që ka të bëjë me sovranitetin.

I ashtuquajturi Ministër për Kosovën në Qeverinë e Serbisë, Goran Bogdanoviq, pas takimit të së enjtes me shefin e UNMIK-ut, Lamberto Zannier, në Beograd, ka thënë se Serbia është e gatshme të bëjë kompromis në zbatimin e marrëveshjes së CEFTA-së me kusht që në vend të vulës së Doganave të Kosovës, të përdoret vula EULEX- Doganat e Kosovës.