Prishtinë. Ministri i Ekonomisë dhe Financave, Ahmet Shala, ka shkelur vendimin qeveritar për ngrirjen e punësimit në Postë-Telekomin e Kosovës (PTK), por ka përfituar punësimin e dy kushërinjve të tij në kompaninë më profitabile në vend.

Sipas burimeve të gazetës “Zëri”, brenda Postë-Telekomit të Kosovës, në mesin e 30 të punësuarve në këtë kompani janë edhe dy kushërinjtë e ministrit Shala me inicialet H. Shala dhe A. Shala (emrat e tyre i posedon gazeta) nga fshati Akrashticë e Vushtrrisë.

Ministri Shala është me origjinë nga fshati Akrashticë e Vushtrrisë, sikurse edhe kushërinjtë e tij të punësuar së fundi në PTK.

Gazeta “Zëri” para dy ditësh ka raportuar se ministri Shala ka qenë i ngarkuar më 13 maj 2010 nga Qeveria e Kosovës që ta zbatojë vendimin për ngrirjen e punësimit në PTK deri në përfundim të procesit të privatizimit të kompanisë, ndërsa rreth 2 muaj më vonë e ka shkelur një vendim të tillë, duke mos e refuzuar kërkesën e Bordit të Drejtorëve të PTK-së, që t’i punësojë 30 punëtorë të rinj në këtë kompani.

Po ashtu është mësuar se për punësimin e këtyre punëtorëve nuk është shpallur konkurs publik, mirëpo PTK i është dërguar një listë nga nivelet e larta qeveritare me emrat e kandidatëve që duhet të pranohen.

Për artikullin e botuar në gazetën “Zëri” lidhur me punësimet e fundit në PTK ka dërguar demant Ministria e Ekonomisë dhe Financave, duke u arsyetuar se arsyeja e plotësimit te këtyre pozitave është bazuar në nevojën e ristrukturimit të korporatës dhe të lirimit të pozitave për shkak të pensionimit të punëtorëve.

Për punësimet e fundit në PTK kanë reaguar edhe deputetë të Kuvendit të Kosovës dhe përfaqësues të shoqërisë civile në vend.

Deputeti i pavarur, Driton Tali ka deklaruar për “Zërin” se punësimet e reja në PTK janë realizuar, pasi që, siç ka thënë ai, i kanë mbetur edhe disa militantë partiakë në rrugë Qeverisë, të cilët është dashur t’i punësojë.

Ai ka shtuar se PTK, KEK-u dhe Aeroporti kanë qenë dhe po mbesin vende shumë të përshtatshme për të punësuar militantët e Qeverisë.

Ndërsa kreu i Organizatës “Çohu”, Avni Zogiani, ka thënë se prej vitit 2008 e deri më tani në PTK janë punësuar rreth 2000 punëtorë. Sipas tij, një prej argumenteve për privatizimin e PTK-së ka qenë se kjo kompani ka mbipunësim, prandaj duhet të privatizohet. “Janë krijuar problemet e tilla, në mënyrë që PTK të shkojë drejt privatizimit”, ka pohuar Zogiani.

Ai ka thënë se punësimi i 30 punëtorëve të rinj, pas vendimit qeveritar për ngrirje të punësimit, është bërë për motive politike dhe siç thotë ai, zyrat e PTK-së janë shndërruar në zyra politike të punësimit.