Prishtinë. Punët në ndërtimin e autostradës nga Morina në drejtim të qytetit të Prizrenit janë duke shkuar sipas dinamikës së paraparë nga konsorciumi implementues “Betchel Enka”, i cili fitoi në tenderin ndërkombëtar për autostrade, e cila e shkurton rrugën mes Kosovës dhe Shqipërisë.

Qindra ekskavatorë dhe kamionë të kompanisë konsorciumit amerikano-turk punojnë pa ndërprerë 24 orë në realizimin e projektit, kostoja përfundimtare e të cilit ende nuk dihet.

Ela Ruci, zëdhënëse e konsorciumit thotë se punët në ndërtimin e autostradës po ecin më shpejt sesa është paraparë. Deri më tash janë hapur 19 kilometra trase.

“ Nga pika kufitare e Vërmicës, e deri në dalje të qytetit të Prizrenit është hapur traseja. Tash ajo është duke u mbushur me gurë. Për dallim nga pjesa e Shqipërisë, ajo e Kosovës kërkon shumë punë në stabilizimin e trasesë, sepse ka shumë ujë dhe pjesa e saj dërrmuese është fushë”, tha ajo.

Sipas zëdhënëses, deri më tash kompania nuk ka pasur asnjë problem sa i përket zhvillimit të punimeve. Ajo tha se fillimisht është punuar në toka publike dhe me pastaj pasi ka filluar procesi i shpronësimit puna ka vazhduar në toka private. Ruci tha se para disa ditësh kompania ka rrënuar edhe tre objektet e para që kanë qenë në vendin kah duhet të kalojë autostrada.

Zëdhënësja Ruci tha se deri më tash kompania ka të angazhuar 1350 punëtorë, ku rreth 60 për qind e tyre janë banore lokalë, përkatësisht vijnë nga vendet kah do të kalojë autostrada. Njëkohësisht janë angazhuar më shumë se 50 kompani vendore.

“Kemi të angazhuar kompani për ndërtim të urave, për mirëmbajtje, për furnizim me derivate, për shpërthim të gurëve, etj.”, tha ajo.

Ruci thotë se tashmë kompania ka filluar të bëjë ndërtimin e urave, ku ajo me e gjata është rreth 500 metra. Në segmentin ku është duke u punuar tash gjenden 5 ura dhe 8 nënkalime. Nga ana tjetër, zëdhënësi i Ministrisë së Transporteve, Xhevdet Pozhari thotë se deri më tash ministra është e kënaqur me dinamikën e punimeve në ndërtimin e autostradës.

Ai shpreh bindjen se edhe kompania që është duke i kryer punët nuk ka pasur asnjë problem, pasi që shpronësimet e janë bërë me kohë. Ai thotë se ministria në vazhdimësi do të mbikëqyrë dhe kontrollojë të gjitha punimet që janë duke u bërë në nderimin e autostradës.

Edhe Shkëlzen Morina, drejtori i departamentit të Tatimit në Pronë në MEF, tha se deri më tash janë shpronësuar dhe është bëre vlerësimi i pronave të paluajtshme që janë objekt i kësaj procedure për 13 zona kadastrale, që përfshijnë 27 kilometra nga Vërmica deri në kufirin administrativ me komunën e Therandës, në fshatin Novakë.

Ai tha se Qeveria në zbatim të ligjit Nr. 03/l-139 "Për shpronësimin e pronës së patundshme", ka miratuar Vendimin Nr. 4/120 për inicimin e procedurave të shpronësimit në segmentet nga Prizreni deri në Qafë të Duhlës dhe nga Aeroporti i Prishtinës deri në Besi.

“Procedura e shpronësimit në segmentin e dytë të autostradës ka filluar dhe janë përmbushur të gjitha kushtet dhe detyrimet ligjore. Për shpronësimin e pronës së patundshme, ka filluar të kryhet pagesa e kompensimit për ata që janë prekur nga procesi i shpronësimit në segmentin e parë të autostradës Vërmicë- Novakë, me një sipërfaqe prej 239 hektarë”, tha ai.

Deri më tani sipas tij, janë paguar rreth 6 milionë euro për kompensimin e pronave.

Ndërkaq, përfaqësues të partive opozitare kërkojnë nga Qeveria më shumë transparencë rreth realizimit të këtij projekti, kostoja e së cilit nuk dihet ende.

Avni Arifi nga Aleanca për Ardhmërinë e Kosovës thotë se çdo detaj në lidhje me autostradën po mbahet shumë e fshehte nga Qeveria e Kosovës.

“Që nga fillimi gjithçka në këtë projekt ka qenë e fshehtë dhe kur diçka fshihet atëherë dihet pse ndodh një gjë e tillë”, tha ai.

Edhe Mimoza Kusari, nga Aleanca Kosova e Re, thotë se nga dita e parë ky projekt ka qenë shumë jotransparent sa i përket përzgjedhjes së kompanisë, çmimit por edhe vendit ka do të kalojë ajo.

“Ky është një projekt shumë i rëndësishëm, por për këtë projekt qytetarët e Kosovës duhet të dinë se çka po ndodh e jo të fshihet gjithçka”, tha ajo. Më shumë transparence për këtë projekt kanë kërkuar edhe përfaqësues të shoqërisë civile në vend.

Avni Zogiani nga organizata për Dinjitet dhe Antikorrupsion “Çohu” ka thënë se paralajmërimi për rritjen e çmimit të autostradës Vermicë-Merdar për dy fish e gjysmë është një sabotazh që Ministria e Ekonomisë dhe Financave bashkë me kryeministrin Thaçi po i bëjnë ekonomisë së Kosovës dhe qytetarit të saj.

Sipas tij, të dhënat e këtij projekti ruhen në mënyrë të fshehtë nga Qeveria e vendit.